४ वर्षअघि आमा-छोराको हत्या गरी शव जलाएर फरार भएका जनिफ पक्राउ

काठमाडौं । ४ वर्षअघि आमा-छोराको हत्या गरी शव जलाएर फरार भएका ४८ वर्षीय महमद जनिफलाई प्रहरीले पक्राउ गरेको छ।

जिल्ला प्रहरी रौतहटले जिल्लास्थित दुर्गा भगवती गाउँपालिका-४ छ्तौनाका ४८ वर्षीय महमदलाई ४ वर्षपछि गाउँपालिकाको पिपरा बजारमा  लुकिछिपी बसिरहेको अवस्थामा पक्राउ गरेको हो।

उनले सोही स्थानकै स्थानीय समरुदिन मियाँ कवारीको २२ वर्षीय श्रीमती हुस्नेहारा खातुन र २ वर्षीय छोरा रेहानको २०७७ बैशाख ११ गते राति ८ बजे हत्या गरेर शव जलाएर फरार भएको रौतहट प्रहरीले जानकारी दिएको छ।

घटनाको अनुसन्धानका क्रममा महमदले हत्या गरेर फरार भएको खुल्न आएपछि उनको खोजीमा लागेको प्रहरीले पिपरा बजारमा लुकिछिपी बसेको अवस्थामा पक्राउ गर्न सफल भएको हो।

पक्राउ परेका महमद जनिविरुद्ध कर्तव्य ज्यान मुद्दा दर्ता गरी जिल्ला अदालत रौतहटबाट म्याद थप गरेर अनुसन्धान सुरु गरिएको जिल्ला प्रहरी कार्यालय रौतहटले जनाएको छ