एआईजी गिरीद्वारा प्रहरी नायब निरीक्षकमा बढुवा भएकालाई दर्ज्यानी चिन्ह प्रदान

काठमाडौं । राष्ट्रिय प्रहरी प्रशिक्षण प्रतिष्ठान महाराजगन्जका प्रमुख प्रहरी अतिरिक्त महानिरीक्षक (एआईजी) सुदीप गिरीले प्रहरी नायब निरीक्षक (सई) मा बढुवा भएकाहरुलाई दर्ज्यानी चिन्ह प्रदान गरेका छन् ।

प्रहरी प्रशिक्षण प्रतिष्ठानमा कार्यरत रहदै गर्दा यही मंसिर ११ गते  प्रहरी सहायक निरीक्षक (असई) बाट सईमा बढुवा भएका तीन जनालाई आज एक समारोहकाबीच एआईजी गिरीले दर्ज्यानी चिन्ह प्रदान गरेका हुन् ।

दर्ज्यानी चिन्ह प्रदान गर्दै एआईजी गिरीले बढुवा भएका उनीहरुलाई बधाई तथा शुभकामना दिँदै आगामी दिनहरुमा अझै जिम्मेवार भएर संगठनले दिएको कार्यलाई व्यवसायिक, ईमान्दारिता तथा थप क्रियाशिल भएर कर्तव्य पूरा गर्न निर्देशन दिएका हुन् ।

गिरीले निर्देशन दिँदै भने-" जवाफदेहिताको लागी राज्य, संगठन र जनता प्रति अनुग्रहित हुदैं कुशलतापूर्वक कार्यसम्पादन गर्नुपर्छ।"

आज सई पूर्ण बहादुर थापा, डिल्ली बहादुर मल्ल र रबिन श्रेष्ठले दर्ज्यानी चिन्ह प्राप्त गरेका हुन् । दर्ज्यानी चिन्ह प्रदान कार्यक्रममा वरिष्ठ प्रहरी अधिकृत तथा अन्य प्रहरी कर्मचारीहरुको उपस्थिति रहेको थियो।