मेलामा दुईवटा पेस्तोल देखाउँदै आतंक मच्चाउने युवक पक्राउ

काठमाडौं । मेलास्थलमा हातमा दुई वटा पेस्तोल देखाउँदै आतंक मच्चाउँदै हिंडे्का एक युवकलाई प्रहरीले पक्राउ गरेको छ। 

सर्लाहीमा लाग्ने गढीमाई मेलास्थलबाट आइतबार  साँझ बलरा नगरपालिका-६, मिर्जापुरका १८ वर्षीय युवक गोलु भनिने अमरजितकुमार सहानीलाई दुई थान पेस्तोलसहित प्रहरीले पक्राउ गरेको हो ।

मेलास्थलमा पेस्तोल देखाउँदै झगडा गरिरहेको अवस्थामा इलाका प्रहरी कार्यालय बलराको टोलीले अमरजितकुमारललाई पेस्तोलसहित पक्राउ गरेको जिल्ला प्रहरी कार्यालय सर्लाहीले जानकारी दिएको छ।

प्रहरीका अनुसार अमरजितकुमारको साथबाट एउटा चाइनिज र अर्को नलकटुवा पेस्तोल बरामद भएको हो।

पेस्तोलसहित पक्राउ परेका युवकलाई जिल्ला प्रहरी कार्यालय ल्याएर थप अनुसन्धान सुरु गरेको प्रहरीले जनाएको छ।