सुनसरीबाट झण्डै २ क्विन्टल गाँजा बोकेको कार, मोटरसाइकलसहित दुई जना नियन्त्रणमा

काठमाडौं । सशस्त्र प्रहरीले झण्डै २ क्विन्टल गाँजा बरामद गरेको छ। सशस्त्र प्रहरीले आज सुनसरीस्थित  धरान उप–महानगरपालिका–१३ शिवधाराको  कोशी लोकमार्गबाट १ सय ९० किलो गाँजा बरामद गरेको हो।

सशस्त्र प्रहरीका अनुसार भेडेटारबाट धरानतर्फ आउँदै गरेको बा १० च ६८५२ नम्बरको सुजुकी कारको डिक्कीमा प्लाष्टिकले प्याकिङ्ग गरी ल्याउँदै गरेको उक्त गाँजा सशस्त्र प्रहरी बल, नेपाल सुरक्षा वेश धरानले बरामद गरेको हो । 

विशेष सूचना पाएर गएको टोलीले उक्त कारलाई पछ्याउँदै आएको को ३५ प २०४५ नम्बरको मोटरसाइलकमा सवार २ जनालाई पनि गाँजा तस्करीमा संलग्न रहेको शंकास्पद अवस्थामा देखिएपछि नियन्त्रणमा लिएको सशस्त्र प्रहरीले जानकारी दिएको छ।

सशस्त्र प्रहरीले बरामद गाँजासहितको कार, मोटरसाइकल र दुई जना व्यक्तिलाई आवश्यक कारवाहीको लागि सम्बन्धित निकायमा बुझाएको जनाएको छ।