श्रोत नखुलेको ६८ लाख नगदसहित ४ जना पक्राउ

काठमाडौं । नेपाल प्रहरीले श्रोत नखुलेको ६८ लाख रुपैयाँसहित चार जनालाई पक्राउ गरेको छ।

काठमाडौंस्थित प्रहरी वृत्त गौशालाबाट खटिएको टोलीले काठमाडौं-९ सिनामंगलबाट कारमा सवार चार जनालाई श्रोत नखुलेको ६८ लाख रुपैयाँ नगदसहित पक्राउ गरेको जिल्ला प्रहरी परिसर काठमाडौंले जानकारी दिएको छ।

काठमाडौं प्रहरीका अनुसार पक्राउ पर्नेमा काठमाडौं-३२ दोभानपुलका ४६ वर्षीय राजकुमार माली, काठमाडौं-१० नयाँ बानेश्वरका १८ वर्षीय किशोर, काठमाडौं-७ शान्तिगोरेटो बस्दै आएका झापाको अर्जुनधारा नगरपालिका-७ का ३२ वर्षीय प्रवेश कुमार पौडेल र झापाकै बिर्तामोड नगरपालिका-५ का २७ वर्षीय युवराज सुवेदी रहेका छन् ।

 मंगलबार श्रोत नखुलेको ६८ लाख रुपैयाँ बोकेर प्रदेश -३-०१-०२२ च १९७२ नम्बरको कारमा सवार उनीहरुलाई हिरासतमा लिएर थप अनुसन्धान भइरहेको प्रहरीले जनाएको छ।