डेढलाख बढी लागुऔषध क्याप्सुल सशस्त्र प्रहरीको नियन्त्रणमा

काठमाडौं । सशस्त्र प्रहरीले पर्साको वीरगन्जबाट डेढ लाख भन्दा बढि  लागूऔषधको क्याप्सुल बरामद गरेको छ ।

पर्सास्थित सशस्त्र प्रहरीले  महानगरपालिका–३  प्रगतिगरको एक किराना पसलबाट डेढ लाख भन्दा बढि क्याप्सुल लागूऔषध बरामद गरेको  जनाएको छ।

सशस्त्र प्रहरीको प्रस्तावित सीमा सुरक्षा गुल्म वीरगन्जबाट डीएसपी सुरज रिजालको कमाण्डमा खटिएको नं. १३ गण पर्सा, बिओपी सिर्सिया र वीरगन्ज भन्सार कार्यालयको संयुक्त टोलीले सोही ठाउँ बस्ने राजाराम महतो कोइरीले संचालन गरेको सृष्टी किराना जनरल स्टोरमा विशेष सूचनाको आधारमा गए राती खानतलासी गर्ने क्रममा ५ वटा कार्टुनमा अबैध रुपले भण्डारण गरी राखिएको १ लाख ५१ हजार ८ सय ६० क्याप्सुल ट्रमाडोल हाइड्रोक्लोराईड नामक लागूऔषध बरामद गरेको सशस्त्र प्रहरीले जानकारी दिएको छ।

सशस्त्र प्रहरीको टोलीले स्टोर संचालक कोइरीलाई समेत वीरगन्ज भन्सार कार्यालय अगाडीबाट नियन्त्रणमा लिएको छ । नियन्त्रणमा लिइएका कोइरी र बरामद गरिएको  लागूऔषधलाई आवश्यक कारवाहीको लागि सम्बन्धित निकायमा बुझाइएको सशस्त्र प्रहरीले जनाएको छ।