आफ्नै बुवाको हत्या आरोपमा ३४ वर्षीय छोरा पक्राउ

सिन्धुपाल्चोक। प्रहरीले एक युवकलाई आफ्नै बुबामो हत्या आरोपमा पक्राउ गरेको छ। सिन्धुपाल्चोक स्थित मेलम्ची नगरपालिका-१० शिखरपुरका ३४ वर्षीय राजाराम बस्नेतलाई प्रहरीले पक्राउ गरेको हो।

प्रहरीका अनुसार राजाराममे शनिबार राति आफ्नै ५० वर्षीय बुवा यदु बहादुर बस्नेतलाई कुटपिट गरेर गम्भीर घाइते बनाएका थिए। छोराले बुवालाई कुटपिट गरेर गम्भीर घाइते बनाएको खबर प्राप्त हुनासाथ इलाका प्रहरी कार्यालय मेलम्चीबाट खटिएको प्रहरीले राजारामलाई पक्राउ गरेको थियो।

सिन्धुपाल्चोक प्रहरीले दिएको जानकारी अनुसार कुटपिटबाट गम्भीर घाइते भएका यदुको मेडिकल कलेज अत्तरखेलमा थप उपचारको क्रममा आज दिउँसो मृत्यु भएको हो ।

उक्त घटनामा पक्राउ परिसकेका यदुका छोरा राजारामसँग थप अनुसन्धान गरिरहेको सिन्धुपाल्चोक प्रहरीले जानकारी दिएको छ।