सिलौटाले हानेर श्रीमानले गरे श्रीमतीको हत्या

रुपन्देही ।  विवादका कारण श्रीमान आफ्नै श्रीमतीको हत्या गरेका छन् । आज दिउँसो रुपन्देहीको बुटवलमा २६ वर्षीय सागर विकले आफ्नै २२ वर्षीया श्रीमती अन्जना विकको हत्या गरेको जिल्ला प्रहरी कार्यालय रुपन्देहीले जानकारी दिएको छ।

रुपन्देही प्रहरीका अनुसार दिउँसो २ बजे सामान्य विवादमा बुटवल उपमहानगरपालिका-११ माझगाउँका  सागरले श्रीमती अन्जनालाई सिलौटाले टाउकोमा हानेर हत्या गरेका हुन् ।

हत्या गरे लगत्तै इलाका प्रहरी कार्यालय बुटवलले सागरलाई पक्राउ गरिसकेको रुपन्देही प्रहरीले जनाएको छ भने अन्जनाको शवलाई पोष्टमार्टमका लागि लुम्बिनी प्रादेशिक अस्पताल बुटवल पठाएको छ।

इलाका प्रहरी बुटवलले सागरलाई हिरासतमा लिएर थप अनुसन्धान सुरु गरेको जिल्ला प्रहरी कार्यालय रुपन्देहीले जानकारी दिएको छ।