बन्दुक र ७ राउण्ड गोलीसहित दुई जना प्रहरीको नियन्त्रणमा

काठमाडौं । प्रहरीले भोजपुरको आमचोक गाउँपालिका-१० स्थित बाघताङ्ग जङ्गलबाट एक नाल बन्दुकसहित दुई जनालाई पक्राउ गरेको छ।

आज दिउँसो प्रहरीले उनीहरुको साथबाट बन्दुकसहित १ नाल र सोही बन्दुकको ७ राउण्ड गोली पनि बरामद गरेको प्रहरी प्रधान कार्यालयले जानकारी दिएको छ।

प्रहरी प्रधान कार्यालयका अनुसार बन्दुकसहित पक्राउ पर्नेमा सोही गाउँपालिका-१० खम्ब्याङ बस्ने ३० वर्षीय बुद्ध चन्द्र राई र २५ वर्षीय सुदिप राई रहेका छन् ।  इलाका प्रहरी कार्यालय बालंखाबाट खटिएको प्रहरीले उनीहरूलाई उक्त बन्दुक र गोली सहित पक्राउ गरेको हो। 

यस सम्बन्धमा प्रहरीले थप आवश्यक अनुसन्धान गरिरहेको प्रहरी प्रधान कार्यालयले जनाएको छ।