१ क्विन्टल ६० किलो गाँजा बोकेको ट्रकसहित दुई जना पक्राउ

काठमाडौं । जिल्ला प्रहरी कार्यालय पर्साले ट्रक र साढे १ क्विन्टल गाँजासहित दुई जनालाई पक्राउ गरेको छ।

प्रहरीले वीरगन्ज महानगरपालिका-१८ स्थित भवानीपुर सिताराम चोकबाट ना३ख ४२१२ नम्बरको ट्रकमा लोड गरेर परवानीपुरबाट ड्राइपोर्ट तर्फ लैजादै गरेको १ क्विन्टल ६० किलो गाँजासहित दुई जनालाई पक्राउ गरेको पर्सा प्रहरीले जानकारी दिएको छ।

पक्राउ पर्नेमा मकवानपुरको हेटौंडा उपमहानगरपालिका-७ कमानेका  ४४ वर्षीय कृष्ण घलान र चितवनका २० वर्षीय रोनाल विश्वकर्मा रहेका छन् । उनीहरुलाई आइतबार गाँजासहित ट्रकसँगै नियन्त्रणमा लिएको पर्सा प्रहरीले जनाएको छ।

ड्राइपोर्ट जाँदै गरेको अवस्थामा ट्रक जाँच गर्दा उनीहरुलाई १० किलोका १६ वटा पोकामा राखिएको उक्त परिमाणको गाँजासहित पक्राउ गरिएको थियो।

पर्सा प्रहरीले उनीहरुलाई हिरासतमा लिएर थप अनुसन्धान अगाडि बढाएको जानकारी दिएको छ।