सवारी दुर्घटनामा ४ जनाको मृत्यु

काठमाडौं । सवारी दुर्घटना विभिन्न स्थानमा ४ जनाको मृत्यु भएको छ। प्रहरी प्रधान कार्यालयले दिएको जानकारी अनुसार भोजपुरको षडानन्द गाउँपालिका-१२ याङपाङस्थित सडकमा को.२ त ८७२० नम्बरको ट्याक्टरबाट लडेर अरुण गाउँपालिका-१ मेहेनपुर बस्ने ४८ वर्षीया धन कुमारी राईको मृत्यु भएको छ।

प्रहरीले ट्याक्टर चालकलाई प्रहरीले नियन्त्रणमा लिएको जनाएको छ । 

त्यसैगरी, रूपन्देहीको मायादेवी गाउँपालिका-५ गोनाहास्थित सडकमा लु.३ च २२०९ नम्बरको पिकअपको ठक्करबाट साइकलयात्री ५० वर्षीय नरभदेश्वर दुवेको मृत्यु भएको  प्रहरीले जनाएको छ। बुधबार बिहान पिकअपको ठक्करबाट गम्भीर घाइते भएका उनको चौराहा अस्पताल बुटवलमा उपचारको क्रममा बुधबार राति मृत्यु भएको हो । पिकअप चालकलाई प्रहरीले नियन्त्रणमा लिएको जानकारी दिएको छ । 

उता धनुषास्थित जनकपुरधाम उपमहानगरपालिक-१९ थुमौनास्थित सडकमा मधेश प्र.०२-००६ प १५०१ नम्बरको मोटरसाइकल अनियन्त्रित भई बुधबार दिउँसो दुर्घटना हुँदा  सोही उपमहानगरपालिका-९ पिपराडी टोल बस्ने ३५ वर्षीय चालक सिकिन्द्र यादव र मोटरसाइकलमा सवार ३२ वर्षीय नन्दलाल यादवको मृत्यु भएको प्रहरीले जानकारी दिएको छ। 

प्रहरीका अनुसार दुर्घटनामा गम्भीर घाइते भएका सकिन्द्रको प्रादेशिक अस्पतालमा र नन्दलालको न्यूरो अस्पताल जनकपुरमा उपचारको क्रममा मृत्यु भएको थियो ।