दुर्घटनामा २ जनाको मृत्यु हुँदा २ जना घाइते

काठमाडौं । सवारी दुर्घटनामा दुई जनाको मृत्यु हुँदा दुई जना घाइते भएका छन् । मोरङको दुई छुट्टाछुट्टै दुर्घटना अन्तर्गत  सुन्दरहरैंचा नगरपालिका-९ र बेलबारी नगरपालिका-१० मा दुर्घटना हुँदा दुई जनाको मृत्यु हुँदा दुई जना घाइते भएको प्रहरीले जानकारी दिएको छ।

प्रहरीका अनुसार पूर्वपश्चिम राजमार्गको सुन्दरहरैंचा नगरपालिका-९ नागदेवी खण्डमा प्र१–०२–०४९ प ३७१८ नम्बरको मोटरसाइकल र प्र १–०२-०५१ प ७६३५ नम्बरको स्कुटर दुर्घटनामा परेको थियो । दुर्घटनामा परी स्कुटर चालक मोरङ सुन्दरहरैंचा नगरपलिका- ९ बस्ने ३८ वर्षीया प्रमिला श्रेष्ठको मृत्यु भएको मोरङ प्रहरीले जनाएको छ।

प्रहरीले दिएको जानकारी अनुसार  दुर्घटनामा परेर गम्भीर घाइते उनलाई उपचारका लागि विराट नर्सिङहोममा भर्ना गरिएकोमा उपचारका क्रममा मृत्यु भएको हो  ।  दुर्घटनामा मोटरसाइकल चालक सुनसरी इटहरी बस्ने ४० वर्षीय नवीन सिंह ठकुरी घाइते भएको प्रहरीकै जानकारी दिएको छ।

त्यसैगरि बेलबारी नगरपालिका-१० चाँदनी चोकस्थित भित्री सडक खण्डमा बेलबारी नगरपालिका १०४–२०८१–८२ नम्बरको सिटी सफारी दुर्घट्ना हुँदा सिटी सफारीमा सवार सोही स्थानकी ५० वर्षीया मायादेवी राजवंशीको मृत्यु भएको छ ।

उनको विराट मेडिकल कलेजमा उपचारका क्रममा मृत्यु भएको हो । सिटी सफारी चालक सोही स्थानका ५० वर्षीय भुपे दाहाल घाइते छन् । उनको विराट मेडिकल कलेजमा उपचार भइरहेको छ । प्रहरीले दुर्घटनाबारे थप अनुसन्धान सुरु गरेको जनाएको छ।