त्रिभुवन अन्तर्राष्ट्रिय विमानस्थलबाट सुनसहित तीन जना पक्राउ

काठमाडौं। त्रिभुवन अन्तर्राष्ट्रिय विमानस्थलबाट प्रहरीले सुनसहित तीन जनालाई पक्राउ गरेको छ।

शुक्रबार दिउँसो सप्तरी घर भएका ३२ वर्षीय कृष्ण प्रसाद चौधरी, ३० वर्षीय मोहम्मद ईलियास र सुनसरीस्थित  ईटहरी उपमहानगरपालिका-१९ घर भएका २७ वर्षीय शिव संकर चौधरीलाई विमानस्थल प्रहरीले सुनसहित पक्राउ गरेको हो।

हिमालय एयरको उडानद्वारा दोहाबाट काठमाडौं विमानस्थलमा अवतरण भएका  उनीहरूलाई त्रिभुवन अन्तर्राष्ट्रिय विमानस्थलको अन्तर्राष्ट्रिय उडान तर्फको आगमन टनेल गेटमा जाँच गर्ने क्रममा मलद्वार भित्र लुकाई छिपाई भन्सार छलि गरेर ल्याइएको सुनसहित पक्राउ गरिएको प्रहरीले जनाएको छ। 

विमानस्थल  प्रहरीले कृष्ण प्रसादको साथबाट करिब ५८.३३ ग्राम तौलको एउटा सुनको सिक्री , मोहम्मदको साथबाट करिब ५८.३३ ग्राम तौलको  सुनको सिक्री र शिव संकरको साथबाट करिब ५८.३३ ग्राम तौलको सुनकै सिक्री  बरामद गरेको  जनाएको छ।

प्रहरीले बरामद गरेको सुनसहित उनीहरूलाई आवश्‍यक अनुसन्धान तथा कारबाहीको लागि त्रिभुवन अन्तर्राष्ट्रिय  विमानस्थल भन्सार कार्यालय पठाएको जानकारी दिएको छ।