रवि लामिछाने अझै दुई दिन न्यायिक हिरासतमा

काठमाडौं । काठमाडौंस्थित स्वर्णलक्ष्मी सहकारी ठगी प्रकरणमा पूर्व गृहमन्त्री एवं राष्ट्रिय स्वतन्त्र पार्टीका सभापति रवि लामिछाने अझै दुई दिन न्यायिक हिरासतमा  भएका छन् ।

जिल्ला अदालत काठमाडौंमा सोमबारदेखि पुन: सुरु भएको थुनछेक बहस आज पनि नसकिएपछि रवि अझै दुई दिन (आज र भोलि ) न्यायिक हिरासतमा बस्ने भएका हुन् ।

भोलि माघे संक्रान्तिको सार्वजनिक बिदा परेकाले बुधबार मात्रै फेरि थुनछेक बहस हुनेछ। आइतबारदेखि सुरु भएको बयान सोही दिन नसकिएपछि जिल्ला अदालत काठमाडौंका  न्यायाधीश माधवप्रसाद अधिकारीले आइतबार हिरासत पठाउने आदेश गरेका थिए । आज पनि रवि पक्षका वकिलहरूले बाहिरै राख्न अनुरोध गरेका थिए ।

तर, न्यायाधीश अधिकारीले आइतबारको आदेशलाई नै निरन्तरता दिइएको इजलासबाटै जानकारी गराएपछि रविलाई न्यायिक हिरासतमा पठाइएको हो।