ठमेलबाट अपहरणमा परेका चिनियाँ नागरिकको फर्पिङबाट उद्धार, ४ भारतीय अपहरणकारी पक्राउ

काठमाडौं । काठमाडौंको ठमेलस्थित एक होटेलबाट अपहरणमा परेका चिनियाँ नागरिकलाई प्रहरीले सकुशल उद्धार गरेको छ।

भारतीय अपहरणकारीहरुले अपहरण गरेर भारतीय नम्बर प्लेटको गाडीमा हालेर लैजाँदै गरेको अवस्थामा प्रहरीले चिनियाँ नागरिक यु हुआन हुआनलाई फर्पिङबाट उद्धार गरेको जिल्ला प्रहरी परिसर काठमाडौंले जानकारी दिएको छ।

मंगलबार दिउँसो १ बजे जिल्ला प्रहरी परिसरजो १०० नम्बरमा ठमेलको होटेलबाट चिनियाँ अपहरणमा परेको सुचना पाए लगत्तै जिल्ला प्रहरी परिसर काठमाडौं र  उपत्यका अपराध अनुसन्धानबाट खटिएको टोलीले फर्पिङबाट उद्धार गरेको हो।

जिल्ला प्रहरी परिसर काठमाडौंका अनुसार अपहरणमा संलग्न ४ भारतीय नागरिकलाई मकवानपुरको भिमफेदीस्थित इलाका प्रहरी कार्यालयको सहयोगमा पक्राउ गरिएको हो।

पक्राउ पर्नेमा ३० वर्षीय अमोल खारमत, ३३ वर्षीय आशुतोष दत्तात्रय थ्रोट, ४० वर्षीय आफा सरुनेश शाइक्स र ३० वर्षीय अमोल शीर्षत रहेका छन् ।  उनीहरु सबै भारतको महाराष्ट्रका हुन् ।

प्रहरीले पक्राउ गरेका चारै जनासँग थप अनुसन्धान सुरु गरेको जनाएको छ।