राप्तीसोनारीको फत्तेपुर ढलैया जङ्गलमा अर्को मोटरसाइकल भ्यानमा ठोक्किँयो, दुई युवक घाइते

नेपालगन्ज । बाँकेको राप्तीसोनारीमा भएको अर्को सवारी दुर्घटनामा दुई जना युवक घाइते भएका छन् ।

गाउँपालिका-६ फत्तेपुर ढलैया जङ्गलमा मोटरसाइकल पिकअप भ्यानसँग ठोक्किँदा स्थानीय दुई युवक घाइते भएको जिल्ला ट्राफिक प्रहरी पोस्ट फत्तेपुरले जानकारी दिएको छ।

मंगलबार राति ८ बजेतिर राप्तीसोनारी-४ बैजापुरदेखि फत्तेपुरतर्फ आउँदै गरेको भे४प ४७६५ नम्बरको मोटरसाइकल भे१च ३५२६ नम्बरको पिकअप भ्यानमा ठोक्किँदा फत्तेपुर बम्लहाका ३० वर्षीय घनश्याम चलाउने र पछाडी सवार पप्पु बिक घाइते भएका हुन् ।

दुर्घटनामा गम्भीर घाइते अवस्थामा रहेका उनीहरुलाई तत्कालै उपचारका लागी नेपालगन्ज नर्सिङ होममा लगिएको ट्राफिक प्रहरीले जनाएको छ। हाल उपचाररत उनीहरु दुबै जनाको अवस्था खतरामुक्त रहेको ट्राफिक प्रहरीले जानकारी दिएको छ।

पिकअप भ्यानलाई गए राति नै प्रहरीले नियन्त्रणमा लिएपनि चालक फरार भएका थिए। भ्यान मालिकले चालकलाई प्रहरी कार्यालयमा उपस्थित गराउने  ट्राफिक प्रहरीले जनाएको छ भने दुर्घटनाको कारण तीब्र गतिकै कारण बताइएको छ।

सोही सडक खण्डमा केही समय पहिला पाँच जनाको मोटरसाइकल दुर्घटनामा मृत्यु भइसकेको छ भने गए राति नै फत्तेपुरमै बसमा मोटरसाइकल ठोक्किँदा दुई युवकको मृत्यु भएको थियो।