दुर्घटना भएको जीपमा च्यापिएर चालकको मृत्यु

काठमाडौं  । जीप दुर्घटना हुँदा चालकको मृत्यु भएको छ । म्याग्दीमा आज भएको जीप दुर्घटनामा बेनी नगरपालिका- ६ जरवुटाका ३५ वर्षीय चालक तेजेन्द्र खत्रीको मृत्यु भएको प्रहरीले जानकारी दिएको छ।

जिल्ला प्रहरी कार्यालय म्याग्दीका अनुसार आज बेनी नगरपालिका- ६ जरवुटामा ग१ज ५९९१ नम्बरको बोलेरो जीप दुर्घटना भएको हो । दुर्घटनामा गम्भीर घाइतेका चालक खत्रीलाई उद्धार गरी उपचारका लागि बेनी अस्पताल पुर्‍याइए पनि चिकित्सकले मृत घोषणा गरेको प्रहरीले जनाएको छ ।

जीप रघुगंगा गाउँपालिकामा ४० मेगावाट क्षमताको रघुगंगा जलविद्युत् आयोजनाको सिभिल ठेकेदार भारतीय कम्पनी जेपी एशोसिएट्सको भएको बताइएको छ ।

खत्री  घर फर्किने क्रममा जीप दुर्घटना भएको हो । उनी जीप मुनि च्यापिएको अवस्थामा प्रहरीले उद्दार गरेको थियो । दुर्घटनाबारे अनुसन्धान भइरहेको म्याग्दी म्याग्दी प्रहरीले जनाएको छ ।