कोशीका पूर्वमुख्यमन्त्री थापामाथि आक्रमण, विद्युत प्राधिकरणका दुई कर्मचारी पक्राउ

विराटनगर । कोशीका पूर्वमुख्यमन्त्री एवं नेपाली कांग्रेस कोशी संसदीय दलका नेता उद्धव थापामाथि आक्रमण भएको छ। 

आज दिउँसो शिवसताक्षीस्थित दोमुखा पर्यटकीयस्थलमा सम्पन्न नेपाल प्रेस युनियन झापाको साधारणसभामा सहभागी भएर अर्जुनधारास्थित निवास फर्किंदै गर्दा उनीमाथि पूर्वपश्चिम राजमार्गको सुरुङ्गा खण्डमा आक्रमण भएको झापा प्रहरीले जानकारी दिएको छ।

पूर्वमुख्यमन्त्री थापामाथि आक्रमण  गर्ने नेपाल विद्युत प्राधिकरणका दुई जना कर्मचारीलाई नियन्त्रणमा लिएर अनुसन्धान अगाडि बढाएको प्रहरीले जानकारी दिएको छ। 

"पूर्वमुख्यमन्त्री कार्यक्रममा सहभागी भएर निवास फर्किंदै हुनुहुन्थ्यो, बाटोमा आक्रमण  भएछ, ती व्यक्ति नेपाल विद्युत् प्राधिकरणको कर्मचारी भएको र  उनीहरूलाई प्रहरीले नियन्त्रणमा लिइसकेको छ”  झापा एसपी मिलन केसीले भने।
    
पूर्वमुख्यमन्त्री थापाले आफू चढेको बा१झ ६५३ नं को गाडीलाई अवरोध गरी उनीहरुले अचानक आक्रमण गरेको झापा प्रहरीले जानकारी दिएको छ । 

आक्रमणमा थापाको आँखा र अनुहारमा चोट लागेको छ । विर्तासिटी हस्पिटलमा उपचारपछि उनी निवास फर्किसकेका छन् ।प्रहरीले आक्रमणस्थलमा रहेको नेपाल विद्युत् प्राधिकरणको सवारी साधनसमेत नियन्त्रणमा लिएको छ ।

थापामाथि आक्रमण गरेका ती दुई व्यक्तिलाई स्थानीयबासीले नियन्त्रणमा लिएर प्रहरीमा बुझाएका हुन् । पक्राउ पर्नेमा शिवसताक्षी-११ का ४९ वर्षीय भक्तबहादुर कटवाल र कन्काई-३ का ४२ वर्षीय पृथ्वी श्रेष्ठ रहेको प्रहरीले जनाएको छ।