बाँकेमा साढे ८ हजार बढी सवारीसाधन कारबाहीमा, ३ महिनामा २० जनाको मृत्यु

अनिल गौतम /बाँके  । बाँके जिल्लामा पछिल्लो ३ महिनायता (कात्तिक-पुससम्म ) सडक दुर्घटनामा परी २० जनाले ज्यान गुमाएका छन् ।  जिल्ला ट्राफिक कार्यालय बाँकेले दिएको अनुसार यस अवधिमा भएका १ सयसय ३५ वटा सवारी दुर्घटनामा २० जनाको मृत्यु भएको हो । 

बाँके ट्राफिक प्रहरी कार्यालयले ३ महिनाको अवधिमा ट्राफिक नियम उल्लङ्घन गरेका ८ हजार ७ सय ७५  सवारीसाधनलाई कारबाही गर्दै  ७५ लाख  १८ हजार रुपैयाँ  राजस्व संकलन गरेको  छ । 

तीन महिनाको अवधिमा भएका सबै दुर्घटनामा गम्भीर घाइतेको संख्या २१ पुग्दा १ सय ६५ जना सामान्य घाइते भएको जिल्ला ट्राफिक प्रहरी कार्यालय बाँकेले जानकारी दिएको छ। जसअनुसार कात्तिकमा मात्रै २० वटा दुर्घटनामा ८ जनाको मृत्यु थियो भने गम्भीर र सामान्य घाइतेको संख्या क्रमश ७ र १७ रहेको छ। 

त्यसैगरी मंसिरको ४० सवारी दुर्घटनामा मृतकको संख्या ३ हुँदा गम्भीर घाइते ११ र सामान्यतर्फ ३८ जना रहेका थिए। पुसमा ७५ सवारी दुर्घटना हुँदा ९ जनाको मृत्यु हुँदा ३ जना गम्भीर घाइते र ६५ जना सामान्य घाइते भएको बाँके ट्राफिक प्रहरीले जानकारी दिएको छ।

जिल्ला ट्राफिक प्रहरी कार्यालय बाँकेका अनुसार पुसमा दुर्घटना र मृतकसँगै घाइतेको संख्या बढ्नुमा हुस्सु र कुहिरोको कारण रहेको छ।

जिल्ला ट्राफिक प्रहरीले पुसमा हुस्सु र कुहिरोका कारण अत्यधिक दुर्घटना भएपछि सार्वजनिक सूचना जारी गर्दै  गति कम गरेर सवारी चलाउन अपिल गरेको थियो।

जिल्ला ट्राफिक प्रहरी बाँकेले ३ महिनामा ५९१ पटक ट्राफिक प्रहरी सचेतना कार्यक्रम गर्दा २९ हजार ६ सय ७७ जना लाभान्वित भएका छन् । यस अवधिमा ट्राफिक प्रहरी बाँकेले हुस्सु र कुहिरोले दुर्घटना निम्त्याउन सक्ने भन्दै सवारीको गति कम गर्न रातको समयमा सवारीसाधनमा रिफ्लेक्टभ स्टिकर टाँसेर सवारी चालाउन आग्रह गर्दै आएको छ।