ब्राउन सुगरसहित ५ जना युवक प्रहरीको नियन्त्रणमा

काठमाडौं । नेपाल प्रहरी लागुऔषधसहित विभिन्न स्थानबाट ५ जनालाई पक्राउ गरेको छ।

जसअन्तर्गत प्रहरीले सुनसरीको इटहरी उपमहानगरपालिका-१ आँपगाछी बस्ने २७ वर्षीय दुर्गेश चौधरीलाई ब्राउनसुगर ७ सय ५० मिलिग्राम सहित पक्राउ गरेको छ । इलाका प्रहरी कार्यालय इटहरी र सामुदायिक प्रहरी पोष्ट शान्तिझोडाबाट खटिएको प्रहरीले उनलाई उक्त पदार्थ सहित पक्राउ गरेको हो ।  

कैलालीको धनगढी उपमहानगरपालिका-३ ८ सय ६० मिलिग्राम  ब्राउनसुगर सहित २ जनालाई प्रहरीले पक्राउ गरेको छ । पक्राउ पर्नेहरूमा सोही उपमहानगरपालिका-८ बस्ने २४ वर्षीया ललिता राना र २४ वर्षीया मनिता चौधरी रहेका छन् । जिल्ला प्रहरी कार्यालय कैलाली र प्रहरी चौकी त्रिनगरबाट खटिएको प्रहरीले से.६ प ६०४५ नम्बरको मोटरसाइकलमा सवार उनीहरूलाई उक्त पदार्थ सहित पक्राउ गरेको हो । 

त्यसैगरि दाङको तुल्सीपुर उपमहानगरपालिका*६ घोराही रोडबाट १ सय २० मिलिग्राम ब्राउन सुगर सहित सोही उपमहानगरपालिका-६ गाइडर बस्ने २१ वर्षीय सन्तोष बिकलाई प्रहरीले पक्राउ गरेको हो । इलाका प्रहरी कार्यालय तुल्सीपुरबाट खटिएको प्रहरीले उनलाई उक्त पदार्थ सहित पक्राउ गरेको हो ।

त्यसैगरी सिराहाको मिर्चैया नगरपालिका-६ भगतपुरबाट ७५ मिलिग्राम ब्राउन सुगर सहित  सोही नगरपालिका-५ बस्ने २९ वर्षीय भोला पंजियारलाई शनिबार साँझ प्रहरीले पक्राउ गरेको हो । इलाका प्रहरी कार्यालय मिर्चैयाबाट खटिएको प्रहरीले उनलाई उक्त पदार्थ सहित पक्राउ गरेको हो ।  

यस सम्बन्धमा प्रहरीले आवश्यक अनुसन्धान गरिरहेको प्रहरी प्रधान कार्यालयले जानकारी दिएको छ।