तुलसीपुर लगायत विभिन्न स्थानबाट ८ जना ब्राउन सुगर कारोबारी लाखौं नगदसहित पक्राउ

काठमाडौं । नेपाल प्रहरीले लागुऔषधसहित दाङको तुलसीपुरसहित विभिन्न स्थान बाट ८ जना लागुऔषध कारोबारीलाई पक्राउ गरेको छ।

प्रहरीले तुल्सीपुर उपमहानगरपालिका-५ ज्योतीनगर टोलबाट १ ग्राम ३ सय ३० मिलिग्राम  ब्राउनसुगर र  ४२ हजार ७ सय रूपैयाँ नगदसहित सोही ठाउँ बस्ने २१ वर्षीय पूर्ण बहादुर बाँठा मगरलाई आइतबार बेलुकी प्रहरीले पक्राउ गरेको छ । इलाका प्रहरी कार्यालय तुल्सीपुरबाट खटिएको प्रहरीले उनलाई उक्त पदार्थ सहित पक्राउ गरेको हो । प्रहरीले थप अनुसन्धानको क्रममा उक्त पदार्थ सोही ठाउँ बस्ने २७ वर्षीय प्रबिन सुनारसँग खरिद गरेको भन्ने खुल्न आएपश्चात प्रहरीले प्रबिनलाई पनि ५ ग्राम ७ सय २० मिलिग्राम  ब्राउनसुगर र १ लाख २४ हजार ३ सय ९५ रूपैयाँ  नगदसहित पक्राउ गरेको हो। 

त्यसैगरी कैलालीको धनगढी उपमहानगरपालिका-३ बाट २ ग्राम २ सय १० मिलिग्राम  खैरो हेरोइन सहित सोही उपमहानगरपालिका-८ बस्ने ३२ वर्षीय मनिष चौधरीलाई आइतबार बेलुकी प्रहरीले पक्राउ गरेको हो । जिल्ला प्रहरी कार्यालय कैलाली र प्रहरी चौकी त्रिनगरबाट खटिएको प्रहरीले उनलाई उक्त पदार्थ सहित पक्राउ गरिएको हो ।

प्रहरीले कञ्चनपुरको भीमदत्त नगरपालिका-१ बाराकुण्डाबाट  १ सय ४० मिलिग्राम खैरो हेरोइन सहित सोही ठाउँ बस्ने २१ वर्षीय जनक भण्डारी समेत ३ जनालाई आइतबार राति प्रहरीले पक्राउ गरेको छ । अस्थायी प्रहरी पोष्ट गैलनदीबाट खटिएको प्रहरीले उनीहरूलाई उक्त पदार्थ सहित पक्राउ गरेको हो । 

त्यस्तै प्रहरीले झापाको हल्दिबारी गाउँपालिका-१  गोलधापबाट ५ सय १० मिलिग्राम  खैरो हेरोइन  सहित २ जनालाई आइतबार राति प्रहरीले पक्राउ गरेको छ । पक्राउ पर्नेहरूमा सोही ठाउँ बस्ने २० वर्षीय सोनु कर्मकार र दमक नगरपालिका-८ वस्ने २३ वर्षीय सक्षम भट्टराई रहेका छन् । जिल्ला प्रहरी कार्यालय झापाबाट खटिएको प्रहरीले प्रदेश १-०१-०१७ प २६१९ नम्बरको मोटरसाइकलमा सवार उनीहरूलाई उक्त पदार्थ सहित पक्राउ गरेको हो ।

सम्बन्धित स्थानका प्रहरी कार्यालय उक्त घटना सम्बन्धमा  आवश्यक अनुसन्धान गरिरहेको प्रहरी प्रधान कार्यालयले जानकारी दिएको छ।