अछाम दिदिबहिनी मृत्यु घटना: पहिला सरस्वतीको हत्या, घटना बाहिरिने डरमा इशराको पनि हत्या

काठमाडौं । अछामका दुई (फूपू-भदा) दिदिबहिनी मृत्युु प्रकरणमा उनीहरुको हत्या भएको  अनुसन्धानमा खुल्न आएको जिल्ला प्रहरी कार्यालय अछामले जानकारी दिएको छ।

अछाम प्रहरीले पक्राउ गरेका दुई युवकबाट अनुसन्धानका क्रममा सोधपुछपछि उनीहरुले नै दुबैको हत्या गरेको बताएका हुन् 

अघिल्लो शनिबार अछामको ढकारी गाउँपालिका-१ छिन्ने जंगलमा ढकारी-८ पल्साताकी १५ वर्षीय सरस्वती खड्का र १४ वर्षीय इशरा खड्का मृत घटना प्रकरणमा पहिला सरस्वतीको ढुङ्गाले हानेर हत्या गरिएको खुल्न आएको प्रहरीले जनाएको छ।

अछाम प्रहरीका अनुसार ढुङ्गा खसेको आवाज आएपछि इशरा र अर्का युवक घटनास्थलमा आइपुग्छन्। त्यहाँ सरस्वतीको शव क्षतविक्षत अवस्थामा देख्छन् । युवकले माथिबाट खसेको ढुङ्गा लागेर उनको मृत्यु भएको दाबी गर्छन् । तर इशराले भने फुपू सरस्वतीको हत्या गरेको भन्दै गाउँमा खबर गरिदिने भनेर आक्रोश व्यक्त गर्छिन् ।

‘घटना बाहिर आउने डरले इशराको पनि हत्या गर्ने आकस्मिक योजना बनाउँछन् । इशारालाई पहिले पछाडिबाट डुङ्गाले हानेर हत्या गरियो, लडेपछि फेरी अगाडीबाट डुङ्गाले हानेर मारिएको देखिन्छ’ प्रहरीले गरेको पत्रकार सम्मेलनमा प्रस्ट परेको थियो ।

गाउँबाट भाग्ने योजना बनाइरहेको अवस्थामा प्रहरीले आइतबार राति उनीहरूलाई पक्राउ गरेको थियो । प्रहरीका अनुसार दुवै किशोरीको हत्यापछि आत्तिएका किशोरले घटनालाई भवितव्य देखाउने उद्देश्यले भीरमाथिबाट शव भएको स्थानतर्फ ढुङ्गा खसालेको पाइएको छ ।

जिल्ला प्रहरी कार्यालय अछाम, नेपाल प्रहरीको केन्द्रीय अनुसन्धान ब्युरो सीआईबी, सुदूरपश्चिम प्रदेश प्रहरी कार्यालय धनगढी र नेपाल प्रहरी प्रदेश कार्यालय महेन्द्रनगरको संयुक्त टोलीले गरेको अनुसन्धानका क्रममा उनीहरुको हत्या भएको खुलेको हो ।

अछामको ढकारी गाउँपालिका–८ पल्सातामा अघिल्लो शनिबार साँझ ढकारी गाउँपालिका–८ की १५ वर्षीया सरस्वती खड्का र उनकी भदै १४ वर्षीया इश्वरी खड्का ढकारी गाउँपालिकाकै–१ स्थित छिन्ने जंगलमा मृत फेला परेका थिए।