सुन पसल लुट्ने योजना बनाइरहेको अवस्थामा अपराधिक गिरोहका एक भारतीयसहित ४ जना पक्राउ

काठमाडौं । नेपाल प्रहरीले अपराधिक गतिविधिमा संलग्न रहेको आरोपमा अपराधिक गिरोहका एक जना भारतीय नागरिकसहित ४ जनालाई पक्राउ गरेको छ। 

सिराहा प्रहरीका अनुसार पक्राउ पर्नेमा भारतीको पश्चिम बंगालस्थित हुगली ग्राम पञ्चायत भगबतीपुर ७ का  निरोज भन्ने मेहराज मोन्डल, सिराहा सुखीपुर नगरपालिका-८ का ४५ वर्षीय वर्ष  इन्दल भन्ने इन्द्रनारायण चौधरी, सोही स्थानकै ३१ वर्षीय भैरव भन्ने देवकुमार मुखिया, लहान नगरपालिका-४  का ४१ वर्षीय दिनेश विश्वकर्मा रहेका छन् ।

पक्राउ परेका उनीहरुले भारत र नेपालका सीमावर्ती स्थानमा अपराधिक गतिविधि गर्दै आइरहेको प्रहरीले जानकारी दिएको छ। सिराह प्रहरीले दिएको जानकारी अनुसार उनीहरुले र दुबै देशका सीमावर्ती स्थानमा अपहरण,  लुटपाट, धम्की दिएर चन्दा  असुल्ने लगायतका अपराधिक ग्रुप चलाउने गर्दै आएका थिए। 

सिराहा प्रहरीले उनीहरुलाई लहान-७ स्थित लहान बजारमा रहेको एक सुन पसलमा लूटपाट गर्ने योजना बनाइरहेको समयमा पक्राउ गरेको जनाएको छ।

मंगलबार पक्राउ गरेका उनीहरुको सिराहा अदालतबाट म्याद थप गरेर अनुसन्धान अगाडि बढाएको सिराहा प्रहरीले जानकारी दिएको छ। उता भारतको प्रहरीले पनि सोही समूहका ४ जनालाई पक्राउ गरेको सिराहा प्रहरीले जनाएको छ।