नेपालगन्जका इरसाद कबाडिया हत्या प्रकरणका अर्का आरोपी शिवराज सिंह पक्राउ

अनिल गौतम, बाँके ।  नेपालगन्ज  उपमहानगरपालिका-११ टांगा स्टेशन नजिक इरसाद राई कबाडिया हत्या प्रकरणमा नेपालगन्जबाट प्रहरीले अर्का आरोपीलाई पक्राउ गरेको छ।

उक्त घटनाका मुख्य आरोपी जाजरकोट कुसे गाउँपालिका-८  का २३ वर्षीय जगत सिंह ठकुरीललाई ७ महिनापछि नेपालगञ्जमा आएको अवस्थामा पक्राउ गरेपछिको अनुसन्धानबाट संलग्नता रहेको खुलेपछि  कालिकोटका सुरज सिंह ठकुरी भन्ने शिवराज सिंहलाई पनि पक्राउ गरेको जिल्ला प्रहरी कार्यालय बाँकेका प्रवक्ता डीएसपी आयुश प्रसाद जोशीले जानकारी दिएका छन् ।

माघ १९ गते राति नेपालगन्जको अछामी होटेलबाट पक्राउ परेका जगतले शिवराजको पनि संलग्नता रहेको बताएपछि प्रहरीले उनलाई पक्राउ गरेको हो। एसपी तुल बहादुर कार्कीको कमान्ड रहेको जिल्ला प्रहरी बाँकेको टोलीले सुरजलाई आज पक्राउ गर्न सफल भएको हो।

डीएसपी जोशीले शिवराजसँग थप अनुसन्धान सुरु गरिएको बताए।

गत असार २८ गते राति करिब पौने ११ बजे नेपालगञ्जको टांंगा स्टेशन नजिक दुई समूहबीच ग्याङफाइट भइरहेको थियो। उक्त ग्याङफाइट छुट्टाउन गएका ३८ वर्षीय इरसाद राई कबडियामाथि खुकुरी प्रहार भएको थियो। गम्भीर घाइते भएका इरसादको उपचारका क्रममा असार २९ गते बिहान उपचारका क्रममा अस्पतालमा मृत्यु भएको थियो।

प्रहरीले घटनास्थलबाट एउटा मोटरसाइकल फेला पारेपछि अनुसन्धानका क्रममा जगत समूहले  इरसादको हत्या गरेको खुल्न आएको जिल्ला प्रहरी कार्यालय बाँकेले जानकारी दिएको छ।

यता उक्त घटनामा प्रहरीले अरुको पनि संलग्नता हुन सक्ने जानकारी दिएको छ।