जिल्ला प्रहरी बाँकेसहित इलाका र वडा प्रहरी कार्यालयमा सुरु भयो ई-हाजिरी

अनिल गौतम,नेपालगन्ज । जिल्ला प्रहरी कार्यालय बाँकेले पुस महिनामा ६१ जना फरार प्रतिवादीलाई पक्राउ गरेको छ। पक्राउ परेका प्रतिवादीहरुबाट २५ बर्ष ९ महिना २१ दिन कैद र २ लाख ६ हजार ७२७ रुपैयाँ जरिवाना असूल उपर गरिएको आज गरिएको पत्रकार सम्मेलन मार्फत बाँके प्रहरीले जानकारी दिएको हो।

बाँके प्रहरीले एक महिनाको अवधिमा गरेको अवैध ओसारपसारविरुद्धको कारबाहीबाट पुस महिनामा १४ लाख ४३ हजार १९६ रुपैयाँ बराबरको सामाग्री बरामद गरेको छ। प्रहरीले बरामद गरेको सवै अवैध सामाग्रीलाई नेपालगन्ज भन्सार कार्यालय बुझाइएको जिल्ला प्रहरी बाँकेले जनाएको छ।

त्यसैगरी, जिल्ला प्रहरी बाँकेमा दर्ता भएका १४६  मुद्दामा १३५ जनालाई पक्राउ गरी कानूनी दायरामा ल्याइएको छ भने ५८ वटा पेण्डिङ मुद्दाहरु फर्छयौट गरिएको बाँके प्रहरीले जानकारी दिएको छ। जिल्ला प्रहरी कार्यालय बाँकेका अनुसार दर्ता भएका ३९४ ठाडो उजुरीका निवेदनमा ३८७  फर्छयौट हुँदा ७ वटा अनुसन्धान प्रक्रियामा रहेका छन् ।

जिल्लाभरमा ३२ सय ९७ वटा सावरी साधनलाई कारवाही गर्दै २५ लाख ४५ हजार रुपैयाँ राजस्व संकलन गरिएको थियो भने अबैध रुपमा नदिजन्य पदार्थ उत्खनन् गर्ने एउटा  ट्याक्टर नियनत्रणमा लिई सम्बन्धित निकायमा पठाएर  ५ हजार रुपैयाँ जरिवाना गरिएको जिल्ला प्रहरी बाँकेले जनाएको छ।

लागुऔषधविरुद्धको कारबाहीमा जिल्ला प्रहरी कार्यालय बाँकेले ५४ ग्राम ३३० मिलिग्राम ब्राउन सुगर, १९० ट्याब्लेट नाइट्राजेपाम सहित ३४ जना ओसारपसार कर्ताहरुहरुलाई पक्राउ गरी कानूनी दायरामा ल्याएको हो।

त्यस्तै नक्कली जग्गा धनी श्रेस्ता बनाई बैंकमा धितो राखी रकम ठगी गर्ने कार्यमा संलग्न ३ जना पक्राउ गरिएको छ भने बिवाह समारोहमा एक युवकको हत्यामा संलग्न ६ जनालाई पक्राउ गरि कानूनी प्रक्रिया अगाडि बढाइएको जिल्ला प्रहरी कार्यालयले जानकारी दिएको छ।

यसैगरी जिल्ला प्रहरी बाँकेले ७ महिना अगाडि नेपालगन्जका ईरसाद कवडियाको हत्या घटनाका दुई जनालाई पक्राउ गरेको जनाएको छ भने बैदेशिक रोजगारमा जापान पठाउने भन्दै १ करोड २३ लाख रकम ठगी गरेको आरोपमा बैजनाथकी २३ वर्षीया युवतीलाई पक्राउ गरेको जानकारी दिएको छ।

बाँकेका विभिन्न स्थानबाट हराएका ६ वटा मोटरसाइकल र ९ वटा मोबाइल (आइफोन) फेला पारेर सम्बन्धित धनीलाई हस्तान्तरण गरिसकेको जिल्ला प्रहरी बाँकेले जानकारी दिएको छ।

त्यस्तै  समुदाय प्रहरी सहकार्यतर्फ १४४ वटा सचेतनामुलक कार्यक्रम गरिएको जिल्ला प्रहरी कार्यालय बाँकेले जनाएको छ। सचेतनातर्फ लैङ्गिक हिंसा, लागुऔषध सचेतना, आत्महत्या न्यूनिकरण सम्वन्धि सचेतना, अल्पशंख्यकसंग प्रहरी, नागरिक सुनुवाई, सितलहर सचेतना, समुदाय प्रहरी साझेदारी, महोत्सवमा (पीएवए) भिडियो प्रदर्शन, साईबर अपराध र चोरी सम्बन्धि लगायतका कार्यक्रम संचालन गरिएका हुन् ।

जिल्लाभरमा प्रहरीले २२० वटा  ट्राफिक सचेतना कार्यक्रम गर्दै लेन अनुशासन, जेब्रा क्रसिङ सम्बन्धि प्रशिक्षण दिएको प्रहरीले जानकारी दिएको छ।

त्यस्तै आन्तरिक सुदृढीकरण प्रयासतर्फ उत्कृष्ट कार्य गर्ने ४ जना प्रहरी कर्मचारीहरुलाई पुरस्कृत र आचरण बिपरित कार्य गर्ने १ जना प्रहरी कर्मचारीलाई कारवाही गरिएको थियो भने बाँके जिल्लाको खजुरामा आयोजित फुटबल प्रतियोगितामा यस कार्यालयको फुटबबल टिमले प्रथम स्थान हाँसिल गरेको  बाँके प्रहरीले जानकारी दिएको छ।

जिल्ला प्रहरी बाँकेका प्रमुख एसपी तुल बहादुर कार्कीको पहलमा जिल्ला प्रहरी कार्यालय र मातहत इलाका प्रहरी कार्यालय तथा  वड प्रहरी कार्यालयमा ईलेक्ट्रिक हाजिरी सिस्टम जडान गरी दैनिक हाजिर गर्ने व्यवस्था सुरु गरिएको हो।

त्यसैगरी एसपी कार्कीले प्रहरी कर्मचारीहरुलाई प्रहरी आचरण, सेवाग्राहीसंग ब्यवहार, सामाजिक संजालको प्रयोग लगायतका बिषयमा प्रशिक्षण दिएको जिल्ला प्रहरी कार्यालय बाँकेले पत्रकार सम्मेलनमार्फत जानकारी दिएको छ।

आजको जिल्ला प्रहरी कार्यालयमा गरिएको पत्रकार सम्मेलनमा बाँकेका एसपी कार्की, पत्रकार महासंघ बाँकेका अध्यक्ष नवीन गिरी लगायत अन्य प्रहरी अधिकृत र पत्रकारहरुको उपस्थितिमा प्रहरी निरीक्षक हिम बिकले कार्यक्रम सन्चालन गरेका थिए।