भारतमा ३५ हजार भारुमा बेचिएका घोराहीका आमाछोराको प्रहरीले गर्‍यो उद्धार, ३ जना पक्राउ

दाङ । जिल्ला प्रहरी कार्यालय दाङले भारतमा ३५ हजार भारुमा बेचिएकी महिलाको  उद्धार गरेको छ।भारतको कृष्णनगरमा सस्तोमा कपडा पाइने प्रलोभन देखाइ दाङ घोराहीकी एक जना २३ बर्षीया आमा र ४ बर्षे छोरालाई मानव तस्करले भारतमा लगेर ३५ हजारमा बिक्री गरेको तथ्य थाहाँ पाएपछि दाङ प्रहरीले उद्धार गरि घर फर्काएको हो ।

आमा र उनका छोरालाई भारतमा बेचेको अभियोगमा दाङ तुलसीपुर उपमहानगरपालिका–१६ घरभई हाल घोराही उपमहानगरपालिका–१५ डिके पेट्रोलपम्प नजिकै डेरा गरी बस्ने राजेश नेपाली र उनकी श्रीमती राधा पाण्डेय छन् ।

जसले ती महिलालाई भारत उत्तर प्रदेश जिल्ला बलरामपुर ललिया निवासी ४९ बर्षीय रामनिवास मौर्यलाई ३५ हजार भारुमा बिक्री गरेका थिए ।
अमानविय कार्यमा संल्गन तीनै जनालाई जिल्ला प्रहरी कार्यालय दाङले पत्रकार सम्मेलन गरि सार्वजनिक गरेको छ ।

दाङ प्रहरीका  अनुसार गत माघ ४ गते राजेश नेपाली र राधा पाण्डेले सस्तोमा कपडा पाइने भन्दै कृष्णनगरमा किन्न जान भनेर साथमै लगेर गएका थिए।तर उनीहरुले ती महिलालाई झुक्याएर बलरामपुर पु¥याएका थिए । त्यहाँ पु¥याएर भारतिय नागरिक रामनिवास मौर्यसँग महिलालाई ३५ हजार रुपियाँमा बिक्री गरेका थिए ।

मौर्यले ती महिलालाई मानसिक यातनका साथै कुटपिट गर्न थालेका थिए । त्यही बीचमा ती महिलाले आँफु बिक्री भएको कुरा मौर्यबाट थाहाँ पाएकी थिइन । त्यसपछि उनले आफ्नी आमालाई फोन गरेर आफु बिक्री भएको जानकारी गराएकी थिइन ।

सोही कुराको निबेदनसहित आमा जिल्ला प्रहरी कार्यालय घोराहीमा पुगेकी थिइन । त्यसपछि प्रहरी फोन आएको नम्वरलाई पछ्याउँदै माघ १५ गते इलाका प्रहरी कार्यालय गढुवाकी प्रमुख प्रहरी निरीक्षक कालिका कार्की नेतृत्वको टोली भारत पुगेको थियो ।

त्यहाँको प्रहरीको सहयोगमा बिक्री भएकी महिलालाई उद्धार गर्नुका साथै त्यो कार्यमा संलग्न तीन जनालाई माघको १७ गते पक्राउ गरि नेपाल फर्किएको थियो ।

पक्राउ परेका अभियुक्तहरुलाई मानव बेचविखन तथा ओसारपसार कसुरमा मुद्धा दर्ता गरि अनुसन्धान भइरहेको प्रहरीले जानकारी दिएको छ ।