सशस्त्र प्रहरीले भन्यो- पद यात्रामा गर्दा सावधान रहनुहोला

काठमाडौं । सशस्त्र प्रहरी बलले गोरखाको साम्दो ईलाकामा पर्ने पदमार्गमा यात्रा गर्दा साबधानी अपनाउन अनुरोध गरेको छ ।

जिल्लाको चुमनुब्री–१ साम्दो क्षेत्रमा हाल ३ फिटसम्म हिउँ परेकोले सो पदमार्गमा यात्रा गर्ने पर्यटकहरुलाई सावधान रहन सशस्त्र प्रहरीले आग्रह गरेको हो । 

केही दिनयता भएको भारी हिमपातले बाटोघाटो अबरुद्ध भएपछी बिओपी साम्दोले हिउँ पन्छाउने कार्य पनि निरन्तर गरिरहेको छ ।यसैगरी उत्तरतर्फका पदमार्गका कतिपय ठाउँमा हाल सशस्त्र प्रहरी बल नेपालका बोर्डर आउट पोस्ट स्थापना भइसकेका र अन्य स्थानमा पनि बिओपी स्थापना गरिने योजना रहेकोले हाल रहेका बिओपी हरुले ती क्षेत्रमा बिपद् उद्वारलाई पनि उच्च प्राथमिकता राखेर कार्य गरिरहेको सशस्त्र प्रहरीले जनाएको छ।

सशस्त्र प्रहरीका अनुसार हाल उत्तरतर्फ १० वटा बिओपी रहेकोमा प्रत्येक १० किलोमिटरमा स्थापना गर्ने संगठनको दिर्घकालिन लक्ष्य रहेको छ ।

हिमाली क्षेत्रमा आवतजावत गर्दा कुनै समस्या भएमा र सुचनाको लागि सशस्त्र प्रहरी बल नेपालको हटलाईन नम्बर १११४ मा सम्पर्क गर्न समेत सशस्त्र प्रहरीले अनुरोध गरेको छ ।