पाल्हीनन्दन गाउँपालिकाका अध्यक्ष लागुऔषध कारोबार मुद्दामा दोषी ठहर

काठमाडौं । अदालतले पश्चिम् नवलपरासीस्थित  पाल्हीनन्दन गाउँपालिका अध्यक्ष बैजुप्रसाद गुप्तालैइ (दीपक) लागूऔषध कारोबारमा दोषी ठहर गरेको छ।

जिल्ला अदालत पश्चिम् नवलपरासीका न्यायाधीश केशवप्रसाद अधिकारीको इजलासले अध्यक्ष गुप्ता र गाउँपालिकाका नगर प्रहरी रघुनाथप्रसाद धोबीलाई कसुरदार ठहर गरेको हो । लागुऔषध बरामद नभए पनि अध्यक्ष गुप्ता अप्रत्यक्ष संलग्न रहेको भन्दै अदालतले दोषी ठहर गरेको हो ।जिल्ला अदालतका सूचना अधिकारी भेषराज खनालले अदालतले गुप्ता र धोबीलाई कसुरदार कायम गरेको र सजाय निर्धारणका लागि आगामी फागुन २९ गतेलाई पेसी तोकिएको सेतोपाटीलाई जानकारी दिए।

धोबी २०७९ असोज २६ गतेदेखि पुर्पक्षका लागि थुनामा छन् । अदालतले अन्य दुई अभियुक्त रामा गुप्ता (रामा साह) र जितेन्द्र पासवानलाई भने सफाइ दिइएको छ । सोही मुद्दाका आरोपित रामा साह र जितेन्द्र पासवानले यसअघि नै सफाइ पाइसकेका थिए भने पाल्हीनन्दन गाउँपालिका ३ का मन्टु भनिने विवेक प्रसाद पाण्डे फरार छन्।  जितेन्द्र र रामा भारत बिहारका बासिन्दा हुन् ।

लागूऔषध अभियोगमा २ देखि १० वर्षसम्म कैद र १ लाखदेखि २० लाख रूपैयाँसम्म जरिबानाको व्यवस्था रहेको छ ।

गाउँपालिका अध्यक्ष गुप्ताको निर्देशनमा रघुनाथ प्रसाद धोबी र मन्टु भनिने विवेकप्रसाद पाण्डेले रामा र जितेन्द्रलाई लागुऔषध कारोबारमा फसाउन खोजेको अदालतले ठहर गरेको हो। 

कवाडको कारोबारमा तिर्नुपर्ने करिब एक करोड ३५ लाख रूपैयाँ बराबरको लेनदेन विवादकै कारण गुप्ताले उनीहरूलाई फसाउन खोजेको रामा र जितेन्द्रको दाबी छ ।

उक्त घटनामा तत्कालीन एसपी ऋषिराम कँडेलले राजनीतिक प्रभावमा गुप्तालाई संरक्षण गरेको आशंकामा उनको सरुवा भएको थियो ।

रघुनाथ र विवेकले २०७९ साल असार २२ गते रामग्राम नगरपालिका वडा नं. १७ पिपरिहयामा रामा र जितेन्द्र चढेको मोटरसाइकल नजिकै लागुऔषधको झोला फ्याँकेर भागेका थिए। प्रहरीले रामा र जितेन्द्रको मोटरसाइकल नजिकै लागुऔषध डाइजेपाम, नुर्फिन र फेनारगन बरामद भएको भन्दै मुद्दा चलाएको थियो। 

कवाड व्यवसाय सञ्चालन गर्दै आएका अध्यक्ष गुप्तासँग रामा र जितेन्द्रले कवाड सामानको कारोबार गर्दै आएका थिए। आरोपित गुप्ता र पीडितहरूबीच कवाड सामानको १ करोड ३५ लाख रुपैयाँ लेनदेनको विषयलाई लिएर विवाद सुरू भएको थियो।  अध्यक्ष गुप्ता माओवादी केन्द्रबाट दोस्रोपटक गाउंपालिका अध्यक्षमा निर्वाचित भएका हुन् ।