निर्धक्कका साथ अवैध रुपले नदिजन्य पदार्थ बोकेर आएका ३ वटा टिपर राप्ती पुलबाट नियन्त्रणमा

बाँके । बाँकेमा  रातको समयमा निर्धक्कका साथ अवैध रुपमा नदिजन्य पदार्थ ओसारपसार गर्दै गरेका तीन वटा टिपरलाई नियन्त्रणमा लिइएको छ।

डुडुवा गाउँपालिका-४ स्थित राप्ती पुल भएर नदिजन्य पदार्थ बोकेर आउँदै गरेका तीन वटा टिपरलाई डुडुवा गाउँपालिकास्थित सशस्त्र प्रहरीको खडैचा बिओपी र डुडुवा गाउँपालिकाको नगर प्रहरीको संयुक्त टोलीले नियन्त्रणमा लिएको सशस्त्र प्रहरी बाँकेले जानकारी दिएको छ।

सशस्त्र प्रहरीका अनुसार गए राति साढे ९ बजे  राप्तीसोनारीबाट अवैध रुपले चोरी पैठारी गरेर ल्याउँदै गरेका ती टिपरहरुलाई जाँच गर्ने क्रममा कुनै पनि बिल नभएको पाइएपछि नियन्त्रणमा लिइएको थियो।

चेकजाँचमा खटिएको संयुक्त टोलीले भे १ ख १७७५,२२६३ र २२८९ नम्बरका टिपरलाई नियन्त्रणमा इलाका प्रहरी कार्यालय कम्दीको जिम्मा लगाएको सशस्त्र प्रहरीले जानकारी दिएको छ।

नियन्त्रणमा लिइएका तीन वटै टिपरलाई आबश्यक कारबाहीका लागि राजस्व अनुसन्धान कार्यालय कोहलपुर बुझाइएको इलाका प्रहरी कार्यालय कम्दीले जानकारी दिएको छ।

बाँकेमा हाल नदिजन्य पदार्थ उत्खननको ठेक्का प्रक्रिया सुरु भएपनि कुनैपनि सवारीसाधनले ढुवानी रातमा गर्न नपाइने प्रावधान रहेको छ। यस्तो अवस्थामा रातमा बिलसहित नदिजन्य पदार्थ लिएर आएको सवारीसाधनलाई सुरक्षाकर्मी वा सम्बन्धित निकायले रोक्न सक्ने बताइएको छ।