दाउन्नेमा बस र ट्रक ठोक्किँएर दुर्घटना

काठमाडौं । दाउन्नेमा बस र ट्रक एकआपसमा ठोक्किँएका छन् । पूर्वपश्चिम राजमार्ग अन्तर्गत बुटवल-नारायणगढ सडक खण्डको दाउन्नेमा बस र ट्रक  ठोक्किँएको प्रहरीले जानकारी दिएको छ।

गएराति बस र  ट्रक  ठोक्किएर दुर्घटना हुँदा रातभर पूर्वपश्चिम राजमार्ग अवरुद्ध भएको थियो । सडक अवरुद्ध हुँदा सवारी साधनको लाइन पूर्वतर्फ दुम्कीबासम्म रहेको थियो । अहिले ठोक्किएका दुवै गाडी हटाएर दुईतर्फी सडक सुचारु गरिएको छ।दुर्घटनामा मानवीय क्षति भने नभएको प्रहरीले जनाएको छ ।

उक्त क्षेत्रमा सडक विस्तारको काम भइरहेको छ । सडक भत्किएर खाल्डाखुल्डी भएकाले लामो समयदेखि यात्रुहरुले सास्ती भोग्दै आएका छन् ।

सडक विस्तारको काम हुँदा सवारीसाधनका चालकले  लेन मिचेर चलाउनाले हुँदा पनि यस क्षेत्रमा दुर्घटना हुने गरेको प्रहरीले जानकारी दिएको छ।