नेपालगन्जकी युवतीसहित विभिन्न स्थानबाट २० जना लागुऔषध कारोबारी पक्राउ

काठमाडौं। प्रहरीले विभिन्न स्थानबाट लागुऔषधसहित २० जनालाई पक्राउ गरेको छ। प्रहरीले लागुऔषध बरामद अभियान अन्तर्गत त्रिभुवन अन्तर्राष्ट्रिय विमानस्थलको टनेल गेटबाट ७ किलो १६८ ग्राम गाँजा सहित २ जना भारतीय नागरिकलाई पक्राउ गरेको छ । 

पक्राउ पर्नेहरूमा ३० र २४ वर्षीय युवक रहेका छन् । नेपाल एयरको उडानद्धारा बैङ्कक हुँदै नेपाल आएका उनीहरुलाई पक्राउ गरेर थप अनुसन्धानका लागि लागूऔषध नियन्त्रण ब्यूरो पठाइएको प्रहरी प्रधान कार्यालय जनाएको छ।

त्यसैगरी प्रहरीले सुनसरीको दुहवी नगरपालिका-१२ पूर्व कुशाहाका ५१ वर्षीय विजय कुमार पौडेललाई अवैध  गाँजा ४ सय ५० ग्राम सहित  पक्राउ गरेको छ । प्रहरी चौकी शुक्रबारेबाट खटिएको प्रहरीले उनको घर तलासी गर्दा उक्त गाँजा फेला पारी पक्राउ गरेको हो । 

प्रहरीले तनहुँको आँबुखैरेनी गाउँपालिका-४ बेनिटारबाट नियन्त्रित लागूऔषध ट्रामाडोल २ सय २९ ट्याब्लेट सहित २ जनालाई पक्राउ गरेको छ । पक्राउ पर्नेहरूमा सोही गाउँपालिका-२ बस्ने २१ वर्षीय मदन गुरूङ र २१ वर्षीय प्रज्वल गुरूङ रहेका छन् । अस्थायी प्रहरी पोष्ट मुग्लिन पुलजिपबाट खटिएको प्रहरीले मुग्लिङबाट आँबुखैरेनीतर्फ जाँदै गरेको प्र.३ ०६-००१ प ९९५७ नम्बरको मोटरसाइकलमा सवार उनीहरूलाई उक्त लागूऔषध सहित पक्राउ गरेको हो । 

यसैगरी प्रहरीले मुगुको छायाँनाथ रारा नगरपालिका-८ सल्लेरीबाट ६६० मिलिग्राम ब्राउनसुगर  सहित ३ जनालाई  पक्राउ गरेको छ । पक्राउ पर्नेहरूमा सोही नगरपालिका-१० बस्ने १९ वर्षीय गोपाल सेजुवाल, सोही नगरपालिका-४ बस्ने २३ वर्षीय सौगात भाम र सोही नगरपालिका-५ बस्ने २७ वर्षीय आकाश परियार रहेका छन् । जिल्ला प्रहरी कार्यालय मुगुबाट खटिएको प्रहरीले उनीहरूलाई उक्त पदार्थ सहित पक्राउ गरेको हो।

प्रहरीले कञ्चनपुरको बेलौरी नगरपालिका-१ खल्लाबाट २ ग्राम ७० मिलिग्राम खैरो हेरोइन सहित ३ जनालाई पक्राउ गरेको छ । पक्राउ पर्नेहरूमा पुर्नवास नगरपालिका-१ अंशुबर्मा बस्ने २२ वर्षीय अभिसेक मोक्ताङ, कैलाली धनगढी उपमहानगरपालिका-११ धुडसुवा बस्ने २१ वर्षीय अरूण गैराल र सोही उपमहानगरपालिका-८ क्याम्पस रोड बस्ने १७ वर्षीय किशोर रहेका छन् । इलाका प्रहरी कार्यालय बेलौरीबाट खटिएको प्रहरीले सु.प.प्र.०१-०१३ प १४५ नम्बरको मोटरसाइकलमा सवार उनीहरूलाई उक्त पदार्थ सहित पक्राउ गरेको हो । 

यस्तै प्रहरीले रौतहटको गरूडा नगरपालिका-५  शिवनगरबाट नियन्त्रित लागूऔषध स्पास्मो २३ ट्याब्लेट सहित वृन्दावन नगरपालिका-७ बस्ने २३ वर्षीय राहुल साह रस्तोगीलाई पक्राउ गरेको छ । इलाका प्रहरी कार्यालय शिवनगरबाट खटिएको प्रहरीले उनलाई उक्त लागूऔषध सहित पक्राउ गरेको हो ।

प्रहरीले कैलालीको गोदावरी नगरपालिका-२ पहाड रोड डेरा गरी बस्ने बाँके नेपालगंज उपमहानगरपालिका-१८ घर भएका २५ वर्षीया ट्युङ्कल शाह समेत ३ जनालाई अवैध  खैरो हेरोइन १ ग्राम ४ सय ६० मिलिग्राम सहित  पक्राउ गरेको छ । इलाका प्रहरी कार्यालय मालाखेतीबाट खटिएको प्रहरीले शाहको कोठा तलासी गर्दा उक्त पदार्थ फेला पारी उनीहरूलाई पक्राउ गरेको हो । 

मोरङको उर्लाबारी नगरपालिका-७ मछिन्द्र चोकबाट अवैध लागूऔषध खैरो हेरोइन जस्तो देखिने पदार्थ ३ ग्राम ६ सय ५० मिलिग्राम सहित झापा भद्रपुर नगरपालिका-४ बस्ने ४५ वर्षीय सन्तोष श्रेष्ठलाई प्रहरीले पक्राउ गरेको छ । इलाका प्रहरी कार्यालय उर्लाबारीबाट खटिएको प्रहरीले उनलाई उक्त पदार्थ सहित पक्राउ गरेको हो । 

त्यसैगरी मकवानपुरको हेटौंडा उपमहानगरपालिका-१० बसपार्क पिपलबोट १० मिलिग्राम  खैरो हेरोइन सहित सोही उपमहानगरपालिका-१४ मयुरधाप बस्ने १९ वर्षीय रोजल ढुङगानालाई प्रहरीले पक्राउ गरेको छ । वडा प्रहरी कार्यालय हेटौंडा मकवानपुरबाट खटिएको प्रहरीले बाप्र३-०२-०२६ प ६२७२ नम्बरको मोटरसाइकलमा सवार उनलाई उक्त पदार्थ सहित पक्राउ गरेको हो । 

यसैगरी मकवानपुरकै हेटौंडा उपमहानगरपालिका-१० आनन्दटोल डेरा गरी बस्ने सोही उपमहानगरपालिका-१० निउरेनी घर भएका २२ वर्षीय बिदिक घलान समेत ३ जनालाई अवैध खैरो हेरोइन १ ग्राम ५ सय मिलिग्राम सहित आज बिहान प्रहरीले पक्राउ गरेको छ । वडा प्रहरी कार्यालय हेटौंडा मकवानपुरबाट खटिएको प्रहरीले उनीहरूलाई उक्त पदार्थ सहित पक्राउ गरेको हो । 

सम्बन्धित प्रहरी कार्यालयले लागुऔषध घटनाका बारेम थप अनुसन्धान गरिरहेको प्रहरी प्रधान कार्यालयले जानकारी दिएको  छ ।