काठमाडौंको सुरुक्षा व्यवस्था कडा पारियो, सुरक्षाकर्मी हाई अलर्टमा

काठमाडौं । आज काठमाडौंको सुरक्षा व्यवस्था कडा पारिएको छ। आज बिहानैदेखि काठमाडौंका विभिन्न स्थानमा सुरक्षाकर्मीलाई हाई अलर्टमा राखिएको हो।

एक साताको पोखरा बसाइँपछि पूर्वराजा ज्ञानेन्द्र शाह काठमाडौं फर्किंदा राजावादी दल र निकट समूहहरुले उनको स्वागतमा प्रदर्शन गर्दैछन् । उनीहरुको प्रदर्शनलाई मध्यनजर गरी काठमाडौंमा सुरक्षाकर्मीलाई ‘हाई अलर्ट’मा राखिएको छ।

काठमाडौंको नारायणहिटी दरबार संग्रहालय, त्रिभुवन अन्तर्राष्ट्रिय विमानस्थल सहितका संवेदनशील पहिचान गरिएका क्षेत्र र मुख्य चोकहरुमा सुरक्षाकर्मीको तैनाथी बढाइएको बताइएको छ।

 उपत्यका प्रहरी कार्यालय काठमाडौंले भिडभाड र जुलुस अनियन्त्रित हुनसक्ने विश्लेषण गरी आवश्यक सुरक्षा रणनीति बनाइएको जनाएको छ । ‘जस्तो परिस्थिति आए पनि सामना गर्ने गरी रणनीति बनाएका प्रहरीले जानकारी दिएको छ।

ज्ञानेन्द्रको स्वागतका लागि राजावादीहरु काठमाडौंका विभिन्न स्थानबाट जुलुससहित त्रिभुवन अन्तर्राष्ट्रिय विमानस्थलको गेट अगाडि भेला हुने तयारीमा छन् । भिड अनियन्त्रित भई हुलहुज्जत, अमर्यादित, अवाञ्छित र गैरकानुनी क्रियाकलाप हुनसक्ने भएकाले त्यसलाई रोक्ने तयारी गरिएको छ। 

आज बिहानैबाट काठमाडौंका चोकचोकमा बर्दीसहितका र सादा पोशाकका गुप्तचर टोली परिचालित भएको काठमाडौं उपत्यका प्रहरी कार्यालयले जनाएको छ।