युएईमा मापसे गरेर झगडा र हो-हल्ला गर्ने नेपालीलाई पक्राउ गरेर नेपाल फिर्ता पठाइँदै

काठमाडौं । युएईमा रहेको नेपाली राजदूतावासले त्यहा रहेका नेपालीलाई मादक पदार्थ सेवन गरेर झै-झगडा र हो-हल्ला नगर्न सचेत गराएको छ।

युएई प्रहरीले मापसे गरेर झगडा र हो-हल्ला गर्ने नेपालीहरुलाई पक्राउ गरी आबश्यक कारबाही गर्दै नेपाल पठाइरहेको जानकार गराउँदै नेपाली राजदुतावासले समयमै सचेत रहन युएईमा रहेका नेपालीलाई आग्रह गरेको हो।

युएईमा नेपालीहरुले मापसे गरेर झै-झगडा जस्ता गलत क्रियाकलाप गरेको बढेको पाइएपछि युएई प्रहरीले त्यस्ता गलत कार्यमा संलग्नलाई धमाधम कारबाही गर्दै नेपाल पठाइरहेको राजदूतावासले जनाएको छ।

राजदूतावासले भनेको छ- "युएईमा रहदा यहाँको ऐन, कानून, नियम र मूल्य मान्यताको पूर्ण पालना गरी सोही अनुरुप आचरण र व्यवहार गर्नुहुन र कानूनीरुपमा निषेध गरिएका क्रियाकलापहरुमा संलग्न नहुन, ट्राफिक नियमको पालना गर्न, साथै आफ्नो ईमिरेट्स परिचय पत्र सधै साथमा लिएर हिड्नु हुन समेत यूएईमा बस्नुहुने सम्पूर्ण नेपाली दाजुभाई दिदीबहिनीहरुलाई हार्दिक अनुरोध छ।"