हत्यापछि बोराभित्र राखेर महिलाको शव खोलामा फालिएको घटनाका थप एक आरोपी पक्राउ

काठमाडौं । हत्या गरेर काठमाडौंको बागमती नदीमा बोरामा प्याक गरेर महिलाको शव फालिएको घटनामा थप एक युवकलाई  प्रहरीले पक्राउ गरेको छ ।

जिल्ला प्रहरी परिसर काठमाडौंका अनुसार पक्राउ पर्नेमा पेम्बा तामाङ रहेका छन् । पेम्बालाई आज जिल्ला प्रहरी परिसर काठमाडौंले पक्राउ गरेको जानकारी दिएको छ । उक्त घटनामा पक्राउ पर्नेको संख्या ६ पुगेको छ। यसअघि नै एक नाबालक गरी ५ जना पक्राउ परिसकेको प्रहरीले जानकारी दिएको छ। 

जिल्ला प्रहरी परिसर, काठमाडौँका सूचना अधिकारी प्रहरी उपरीक्षक अपिलराज बोहराका अनुसार यसअघि पक्राउ पर्नेमा सर्लाही बागमती ढुङ्गेखोलाका कैलाश खड्का, मकवानपुर हेटौँडा शिखरपानीका सुरेश तामाङ, नुवाकोट मेघाङका रोशन तामाङ, सिन्धुपाल्चोक तिपिनेका पुजा परियार र एक नाबालक रहेका छन् ।

काठमाडौँ गोकर्णेश्वर नगरपालिका-७ नामी कलेज नजिक बागमती खोलाको बीच भागमा बोराभित्र पानीमा डुबेको अवस्थामा अन्दाजी वर्ष ३०-३५ की महिला यही फागुन २४ गते बिहान मृत फेला परेकी थिइन् । 

प्रहरी वृत्त बौद्धबाट प्रहरी टोली खटिई गएको टोलीले शव पोष्टमार्टमका लागि त्रिवि शिक्षण अस्पताल महाराजगञ्ज पठाएको काठमाडौं प्रहरीले जानकारी दिएको छ।

प्रारम्भिक अनुसन्धानका क्रममा निजको हत्यामा ती व्यक्तिको सङ्लग्नता खुल्न आएकोले उपत्यका स्थित विभिन्न स्थानबाट निजलाई जिल्ला प्रहरी परिसर काठमाडौँसमेतको प्रहरी टोलीले पक्राउ गरेको थियो । 

आरोपीहरुलाई काठमाडौँ जिल्ला अदालतबाट  म्याद थप गरी थप अनुसन्धान सुरु गरिरहेको जिल्ल प्रहरी परिसर काठमाडौंले जनाएको छ ।