चोरीको मोटरसाइकलसहित २० वर्षीय युवक ट्राफिक प्रहरीको नियन्त्रणमा

काठमाडौं । उपत्यका ट्राफिक प्रहरीले चोरी भएको मोटरसाइकलसहित एक युवकलाई पक्राउ गरेको छ।

उपत्यका ट्राफिक प्रहरी कारबाहीले गरेको छड्के चेकिङमा काठमाण्डौ महानगरपालिका-१० बुद्धनगरबाट स्याङ्जाको चापाकोट नगरपालिका-९ निर्दिमका २० वर्षीय विराट पंज्ञानीलाई चोरीको मोटरसाइकलसहित पक्राउ गरेको उपत्यका ट्राफिक प्रहरी कार्यालय काठमाडौंका एसपी दीपक गिरीले जानकारी दिएका छन् ।

एसपी गिरीका अनुसार विराटलाई शंकास्पद रुपले चलाउदै गरेको प्रदेश ३-०२-०३० प १७ २७  नम्बरको सेतो एनएस पल्सर मोटरसाइकलसहित ट्राफिक प्रहरीले नियन्त्रणमा लिएको थियो। ट्राफिक प्रहरीले नियन्त्रण लिएको मोटरसाइकल र पक्राउ परेका विराटलाई थप अनुसन्धान तथा कारबाही प्रक्रियाका लागि जिल्ला प्रहरी परिसर लालितपुर पठाइएको एसपी गिरीले बताए। उक्त मोटरसाइकलको वास्तविक नम्बर बागमती प्रदेश ०२-०३५ प २६ ३९ रहेको छ।

नियन्त्रणमा लिइएको उक्त मोटरसाइकल फागुन १  गते  ललितपुर महानगरपालिका-२० छावहाल नटोलबाट चोरी भएको थियो। मोटरसाइकल चोरी भए लगत्तै पाँचथरको फिदिम नगरपालिका-७ का शिवाक्ष राईले उपत्यका  ट्राफिक प्रहरी कार्यालयमा निवेदन दिएका थिए।

निवेदन पश्चात् खोजतलास गर्ने क्रममा ट्राफिक प्रहरीले उक्त मोटरसाइकलसहित विराटलाई पक्राउ गरेको एसपी गिरीले जानकारी दिएका छन् ।