पेस्तोल, १० राउन्ड गोली र लागुऔषधसहित एक युवक पक्राउ

काठमाडौं । प्रहरीले एउटा पेस्तोल र लागु औषधसहित एक युवकलाई पक्राउ गरेको छ।

काठमाडौंको गोकर्णेश्वरबाट  काठमाडौं महानगरपालिका-२० घर भई हाल गोकणेश्वर नगरपालिका-२ भाडगाउँमा डेरा गरी बस्दै आएका ३३ वर्षीय सुदन जोशीलाई प्रहरीले पेस्तोलसहित पक्राउ गरेको हो।

काठमाडौं प्रहरीले दिएको जानकारी अनुसार जोशीले कोठामा अवैध हातहतियार लुकाएर राखेको भन्ने सूचनाको आधारमा जिल्ला प्रहरी परिसर, काठमाडौंको समन्वयनमा प्रहरी वृत्त स्वयम्भूको टोलीले खानतलासी गर्दा पेस्तोल र लागुऔषध बरामद गरेको हो।

प्रहरीले तलासी गर्ने क्रममा एउटा पेस्तोल, दुई थान  म्याग्जिन,१० राउन्ड गोली  लागुऔषध (पोल्याण्ड) २ सय ५० ग्राम, ट्रामाडोल १० क्याप्सुल, ल्यापटप १ थान, तराजु १ थान, मोबाइल ७ थान र आई प्याड १ थान प्रहरीले बरामद गरेको जिल्ला प्रहरी परिसर काठमाडौंले जानकारी दिएको छ।

काठमाडौं प्रहरीले पक्राउ परेका जोशीविरुद्ध अदालतबाट ५ दिनको म्याद थप गरेर अनुसन्धान अगाडि बढाएको जनाएको छ।