अमेरिका पठाउने भन्दै ५३ लाख रुपैयाँ ठगी गर्ने दुई जना पक्राउ

काठमाडौं । बेरोजगार युवायुवतीहरुलाई रोजगारीको आकर्षक तलबको प्रलोभनमा पारेर अमेरिका लैजाने भन्दै लाखौं रुपैयाँ ठगी गरेको आरोपमा प्रहरीले दुई जनालाई पक्राउ गरेको छ।

अमेरिका पठाउने भन्दै पीडितबाट ५३ लाख रुपैयाँ ठगी गरेर सम्पर्कविहीन भएका ४० वर्षीय ललित लिम्बु भन्ने ललित बहादुर ईवारम र ३३ वर्षीय दिपेश लिम्बु भनिने सुब्बा लिम्बुलाई उपत्यका अपराध अनुसन्धान कार्यालयले पक्राउ गरेको हो।

पीडितले दिएको निवेदनका आधारमा उनीहरुलाई अपराध अनुसन्धानको टोलीले  काठमाडौं-८,बुढानिलकण्ठबाट पक्राउ गरेको जनाएको छ। उनीहरु दुबै जना ताप्लेजुङको सिरिज‌ङ्घा गाउँपालिका-१ घर भई हाल काठमाडौंमा बस्दै आएका थिए।

पक्राउ परेका उनीहरुलाई आबश्यक कारबाही तथा अनुसन्धानका लागि वैदेशिक रोजगार विभाग ताहाचल पठाइएको उपत्यका अपराध अनुसन्धान कार्यालयले जानकारी दिएको छ।