मोटरसाइकल दुर्घटना हुँदा चालकको मृत्यु, पछाडि सवार घाइते

काठमाडौं । मोटरसाइकल दुर्घटनामा एक युवकको मृत्यु भएको छ। प्रहरीका अनुसार दुर्घटनामा मृत्यु हुने मोटरसाइकल चालक ३२ वर्षीय राजेन्द्र सुवेदी रहेका छन् ।

गए राति कैलालीको अत्तरिया–धनगढी ६ लेन सडकखण्डको गेटा मेडिकल कलेज अगाडि सुपप्र ०१००९ प १२५१ नम्बरको मोटरसाइकल दुर्घटना भएको प्रहरीले जानकारी दिएको छ। उक्त दुर्घटनामा बर्दगोरिया गाउँपालिका-४ का ३२ वर्षीय राजेन्द्रको मृत्यु भएको हो।

कैलाली प्रहरीले दिएको जानकारी अनुसार राजेन्द्रको उपचारका क्रममा सेती प्रादेशिक अस्पतालमा मृत्यु भएको हो।

दुर्घटनामा मोटरसाइकलको पछाडि सवार बाजुरास्थित  बुढिनन्दा नगरपालिका-४ का २४ वर्षीय जनक रोकाया घाइते भएका छन् । उनलाई पनि सेती प्रादेशिक अस्पतालमा लगेर उपचार गरिरहेको कैलाली प्रहरीले जानकारी दिएको छ।