अपहरण गर्ने धम्की दिँदै रकम मागेको आरोपमा एक व्यक्ति पक्राउ

काठमाडौं। आपराधिक लाभ (एक्सटर्सन) लिन नहुने कसुरमा संलग्न रहेको अभियोगमा प्रहरीले एक जनालाई पक्राउ गरेको छ।

प्रहरीले  सर्लाहीको धनकौल गाउँपालिका-२ ठेगाना भई भक्तपुर सूर्यबिनायक नगरपालिका-२ लोकन्थली बस्नेसुदिप कुमार साह गुप्तालाई पक्राउ गरेको जानकारी दिएको छ।

आपराधिक लाभ लिने उद्देश्य सहित योजनावद्ध तवरले धाकधम्की दिई अपहरण समेत गर्ने डर त्रास देखाई रकम माग गरेको भन्ने उजुरीको आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले उक्त कार्यमा संलग्न गुप्तालाई काठमाडौं महानगरपालिका-३२ कोटेश्वर महादेवस्थानबाट पक्राउ गरेको हो । 

उनलाई आपराधिक लाभ (एक्सटर्सन) लिन नहुने कसुर उद्योगमा थप अनुसन्धानको लागि जिल्ला प्रहरी परिसर काठमाडौं पठाइएको छ ।