ससुराली हिंडेका २५ वर्षीय युवकको विभत्स हत्या, शव जलाइएको अवस्थामा भेटियो

काठमाडौं । ससुराली हिडेका एक युवकको विभत्स हत्या गरेर जलाइएको अवस्थामा शव फेला परेको छ।

धनुषाको क्षिरेश्वर नगरपालिका-८ दिगम्बरपुरका शिवशंकर महतोलाई महोत्तरीस्थित गौशाला नगरपालिका-८मा रहेको सागरनाथ वन विकास परियोजनाको जंगलमा रहेको रेलवे ट्र्याक भन्दा १ सय मिटर पर  क्षिरेश्वर नगरपालिका-८ दिगम्बरपुरका २५ वर्षीय युवक  शिवशंकरको शव फेला परेको प्रहरीले जानकारी दिएको छ।

प्रहरीले  शुक्रबार साँझ साढे ५ बजे हत्या गरेर ज्लाइएको अवस्थामा शव फेला पारेपछि शनिबार मात्र मृतक शिवशंकर रहेको खुल्न आएको जनाएको छ। 

प्रहरी भन्छ- ‘शव र घटनास्थलको प्रकृति हेर्दा हत्या भएको हाम्रो प्रारम्भिक अनुमान छ । शिवशंकरको शव नग्न अवस्थामा, खुकुरीले शरीरको विभिन्न भागमा आक्रमण गरेको र मुखमा आगो लगाएको जस्तो देखिन्छ ।"

हत्या भएको प्रारम्भिक अनुमान गरी थप अनुसन्धान सुरु गरेको प्रहरीले जनाएको छ ।

प्रहरीका अनुसार शिवशंकर बिहीवार दिउँसो शिवशंकर श्रीमती सृजनासँगै १० महिने छोरालाई लिएर बर्दिबास नगरपालिका ५ पशुपतिनगर बन्द्रास्थित ससुराली हिडेका थिए। ससुरालीबाट लिन आएका दुई वटा मोटरसाइकलमा चढेर उनीहरु ससुरालीतर्फ गएको प्रहरी भन्छ।

महोत्तरी प्रहरीले दिएको जानकारी केही दिन अघि ससुरालीमा विवाद हुँदा शिवशंकरमाथि कुटपिट भएको थियो । विवादपछि श्रीमती र बच्चासहित घर फर्किंदा शिवशंकर फेरि ससुराली जान मानेका थिएनन् । उनलाई श्रीमती सृजनाले  हजुरबुबाको मृत्यु भयो भनेर ससुराली जान बाध्य बनाएकी शिवशंकरका भाइ रामले प्रहरीलाई जानकारी दिएका छन् ।

यता प्रहरीले सबै कुनाबाट घटनाको अनुसन्धान सुरु गरेर दोषीलाई कानुनी दायरामा ल्याइने जानकारी दिएको छ।