बर्दियाबाट ब्राउन सुगरसहित २ युवक पक्राउ, अवैध तस्करीको ९६ किलो कुखुरा बरामद

बर्दिया । बर्दिया प्रहरीले दुई जना युवकलाई ब्राउन सुगरसहित पक्राउ गरेको छ भने भारतबाट अवैध रुपले ल्याइएको झण्डै १ क्विन्टल बोइलर कुखुरा पनि बरामद गरेको छ।

जिल्ला प्रहरी कार्यालय बर्दियाले दिएको जानकारी अनुसार जिल्लास्थित बार्हबर्दिया नगरपालिका-५ सोनपुरका बिपीन कुमार थारु र सोही नगरपालिका-६ का सचिन सापकोटालाई आज ८ सय ९० मिलिग्राम ब्राउन सुगरसहित पक्राउ गरिएको हो।

बर्दिया प्रहरीले पक्राउ परेका दुबै युवकसँग लागुऔषध कसुरमा थप अनुसन्धान गरिरहेको जानकारी दिएको छ।

त्यसैगरी, जिल्लाको बढैयाताल गाउँपालिका-८ सावनघारीबाट जिल्ला प्रहरी कार्यालय बर्दियाबाट खटिएको प्रहरी टोलीले झण्डै १ क्विन्टल अवैध बोइलर कुखुरा बरामद गरेको छ।

भारतबाट अवैध रुपले तस्करी गरेर ल्याउँदै गरिएको ३५ हजार ६ सय रुपैयाँ बराबरको ९६ किलो कुखुरा र कुखुरा ओसार्न प्रयोग गरिएको साइकलसमेत बरामद गरेको जिल्ला प्रहरी कार्यालय बर्दियाले जनाएको छ।

बरामद गरिएको कुखुरालाई आजै आबश्यक कारबाहीका लागि सम्बन्धित कार्यालयमा पठाइएको जिल्ला प्रहरी कार्यालय बर्दियाले जानकारी दिएको छ।