जीपबाट खसेर सोही जीपका मालिकको मृत्यु

नेपालगन्ज । जीपबाट खसेर ३४ वर्षीय युवकको मृत्यु भएको छ। डोटीको सिलगढी नगरपालिका-१ तिखामा जीपबाट खसेर सोही जीपका धनी ३४ वर्षीय ज्ञानेन्द्र बहादुर बोहराको मृत्यु भएको प्रहरीले जानकारी दिएको छ।

प्रहरीका अनुसार दिपायल हुँदै आदर्श गाउपालिकातर्फ जाँदै गरेको सुपप्र १–००१ च ४११८ नम्बरको बोलेरो जीपको पछाडी ढालामा बसेको अवस्थामा सडकमा  खसेर आदर्श गाउँपालिका–२ को कुचेडाका बोहरा गम्भीर घाइते भएका थिए।

गम्भीर घाइते भएका बोहरालाई उपचारका लागी शैलेश्वरी अस्पताल लगिए पनि उपचारका क्रममा मृत्युु भएको डोटी प्रहरीले जनाएको छ ।

प्रहरीले आदर्श गाउँपालिका-३ का २३ वर्षीय चालक विराज भट्ट र जीपलाई नियन्त्रणमा लिएर थप अनुसन्धान अगाडि बढाएको जानकारी दिएको छ।