चोरी भएका सुनका गहनासहित ३ जना दाङबाट पक्राउ

दाङ । घरमा कोही नभएको मौका छोपी सुनका गरगहना र नगद चोरी गरेको आरोपमा प्रहरीले तीन जनालाई पक्राउ गरेको छ। घोराही उपमहानगरपालिका- १७ का २२ बर्षीय शरद विश्वकर्माको घरबाट सुनका गरगहना चोरी गरेको आरोपमा उनीहरुलाई पक्राउ गरेको जिल्ला प्रहरी कार्यालय दाङले जानकारी दिएको छ।

चोरीका गरगहना किन्ने घोराही-१४ सैनिक रोडस्थित ‘ जयमा सिंह सुनचाँदी गहना उद्योग’ नामक पसल सञ्चालक ६५ बर्षीय गुणराज शाक्यपनि पक्राउ परेको जिल्ला प्रहरी प्रबक्ता डिएसपी चक्रबहादुर शाहले जानकारी दिएका छन्  ।

घोराही-१५ एकता टोलकी ३८ बर्षीया तेजकुमारी बुढाथोकीको घरमा चैत ६ गते चोरी भएको थियो। चोरले सुन चाँदीका गर गहाना चोरी लगेको हुँदा बुढाथोकीले प्रहरीमा निबेदन दिएकी थिइन।

चोरीमा संलग्न ब्यक्तिको हुलियाको आधारमा खोजी गर्ने क्रममा लमही नगरपालिका-६ अर्जुन खोलाबाट बिश्वकर्मा पक्राउ परेका थिए । उनी सोमबार बिहान ११ बजेतिर पक्राउ परेका थिए ।

पक्राउ परेपछि स्वरुप परिवर्तन गरि बेचेका सुन र चाँदीका गरगहना पनि बरामद भएका थिए । स्वरुप परिवर्तन गरिएको ४ आना तौल भएका सुनका २ डल्ला, ६ आना तौल भएको सुनको १ डल्ला, १ तोला ८ लाल तौल भएको सुनको अर्कौ १ डल्लो बरामद भएको थियो ।

त्यस्तै सुनको ‘टी’ लेखेको एउटा सिक्री, चाँदीको पाउजु १ जोडा, चाँदीको हातमा लगाउने बाला १ थान बरामद भएको डिएसपी शाहले बताए ।

त्यस्तै नगद ५० हजार चोरी गरेको आरोपमा घोराही-१७ चौघेराका २५ बर्षीय रोशन चौधरी पक्राउ परेका छन् । घोराही -१३ खरकट्टीमा मनिषा रोकाको घरमा चैत १५ गते दिउँसो नगद रकम चोरी भएको थियो ।

रोकाले पनि प्रहरी कार्यालयमा निबेदन दिएकी थिइन । अनुसन्धान गर्दै जाँदा चौधरी पक्राउ परेका हुन ।

चौघेराबाट घोराही तर्फ आउँदै गरेका चौधरीलाई प्रहरीले पक्राउ गरेको थियो । पक्राउ परेकाहरुसँग प्रहरीले थप अनुसन्धान गरिरहेको जनाएको छ।