मोटरसाइकल चोरीमा संलग्न युवक ट्राफिक प्रहरीको नियन्त्रणमा

काठमाडौं । मोटरसाइकल चोरीमा संलग्न रहेको आरोपमा  ट्राफिक प्रहरीले एक युवकलाई पक्राउ गरेको छ। 

काठमाडौं उपत्यका ट्राफिक प्रहरी कार्यालयको टोलीले काभ्रेको महाभारत गाउँपालिका-१ घर भएर हाल भक्तपुरको ठिमि बस्ने २४ वर्षीय दुर्गा बहादुर दर्लामीलाई  मोटरसाइकल चोरीको आरोपमा पक्राउ गरेको हो।

चैत १५ गते दिउँसो मध्यपुर ठिमी नगरपालिका-५ राधेराधेमा चोरी भएको प्रदेश १-०२-०४५ प २६२४ नम्बरको पल्सर मोटरसाइकलमा पछडि बसेर आएका दर्लामी ट्राफिक प्रहरीको चेकजाँचका क्रममा सोही स्थानबाट चालकसँगै फरार भएका थिए। 

ट्राफिक प्रहरीले मोटरसाइकललाई नियन्त्रणमा लिएर सवारीधनी र मोटरसाइकल छोडेर फरार भएकालाई खोजतलास गर्ने क्रममा उक्त मोटरसाइकल काठमाडौंको टोखा नगरपालिका-७ धापासीबाट चैत ७ गते चोरी भएको खुल्न आएको ट्राफिक प्रहरीले जानकारी दिएको छ।

चोरीमा संलग्न रहेकाको खोजतलास गर्ने क्रममा ट्राफिक प्रहरीले भक्तपुरको कमलबिनायक सडकखण्डबाट दर्लामीलाई मंगलबार नियन्त्रणमा लिएको उपत्यका ट्राफिक प्रहरी कार्यालय काठमाडौंले जानकारी दिएको छ। पक्राउ परेका दर्लामीलाई आबश्यक कारबाहीका लागि प्रहरीको जिम्मा लगाइएको ट्राफिक प्रहरीले जनाएको छ।