३ सय किलो गाँजासहित २६ वर्षीय युवक पक्राउ

धनकुटा। धनकुटाको साँगुरीगढी गाउँपालिका-६ कामछेकस्थित भेडेटार रविराँके सडकबाट लागूऔषध करिब ३ सय किलो गाँजासहित प्रहरीले एक युवकलाई पक्राउ गरेको छ।

पक्राउ पर्नेमा मोरङको विराटनगर महानगरपालिका-१५ बस्ने २६ वर्षीय प्रिन्स कुमार साह रहेका छन् ।

इलाका प्रहरी कार्यालय भेडेटारबाट खटिएको प्रहरीले को.१ च ३४७८ नम्बरको कारलाई जाँच गर्ने क्रममा ३० वटा पोकामा रहेको उक्त परिमाणको गाँजा फेला पारी कारमा सवार  साहलाई पक्राउ गरेपनि कार चालक फरार भएको प्रहरीले जानकारी दिएको छ।

प्रहरीले हाल फरार कार चालकको खोजी गर्नुका साथै यस सम्बन्धमा थप अनुसन्धान गरिरहेको प्रहरीले जनाएको छ।