तुलसीपुरमा किशोरीलाई बलात्कार गरी सल्यान भागेका युवक पक्राउ

काठमाडौं । दाङको तुलसीपुरमा एक किशोरीलाई बलात्कार गरेर भागेर सल्यान पुगेका एक जना युवकलाई प्रहरीले पक्राउ गरेको छ।

चैत १९ गते राति ९ बजेतिर एक जना १६ बर्षीया किशोरीलाई  फकाएर तुलसीपुरस्थित ‘होटेल गेष्ट हाउसमा’ पुर्‍याइ बलात्कार पछि भागेर सल्यान पुगेका २२ बर्षीय युवक अर्जुन थापालाई प्रहरीले पक्राउ गरे तुलसीपुर ल्याएको जानकारी दिएको छ।

इलाका प्रहरी कार्यालय तुलसीपुरका अनुसार किशोरी बलात्कारपछि थापा दाङबाट भागेर सल्यानको शारदा नगरपालिका- ७ कुरलमा लुकिछिपी बसेको अवस्थामा उनलाई फेला पारिएको थियो।

थापाको घर सल्यानको शारदा नगरपालिका-७ हो । पछिल्लो समय उनी दाङको तुलसीपुर उपमहानगरपालिका-५ बसपार्कमा बस्दै आएका थिए ।

बलात्कारपछि ती किशोरीलाई होटेलमै छोडेर थापा राति भागेका थिए । पीडित किशोरीको जाहेरीका आधारमा थापाको खोजी सुरु भएको थियो ।घटनाबारे थप अनुसन्धान भइरहेको इलाका प्रहरी कार्यालय तुलसीपुरले जानकारी दिएको छ।