सशस्त्र प्रहरी बल नं.३० गण बागेश्वरी बाँकेले मनायो १८ औं स्थापना दिवस

नेपालगन्ज । सशस्त्र प्रहरी बल नं. ३० गण बागेश्वरी बाँकेले आफ्नो १८ औं स्थापना दिवस धुमधामका साथ मनाएको छ।

सशस्त्र प्रहरी बल नं. ५ विन्ध्यावासिनी बाहिनी प्रमुख डीआईजी प्रदीप कुमार पालको प्रमुख आतिथ्यता तथा नेपालगन्जका मेयर प्रशान्त बिष्टको विशिष्ट आतिथ्यता र सशस्त्र प्रहरी बल नं. ३० गणका एसपी शोभाकान्त खनालको अध्यक्षतामा आज नेपालगन्जस्थित गणमा आयोजित स्थापना दिवसमा विभिन्न कार्यक्रम गरिएको सशस्त्र प्रहरी बल नं.३० गणले जानकारी दिएको छ।

स्थापना दिवस कार्यक्रमलाई सम्बोधन गर्दै डीआईजी पालले देश र जनताको सुरक्षाको लागि अहोरात्र खटिएर  सशस्त्र प्रहरी बल नं.३० गण बागेश्वरी बाँकेले राज्यले दिएको जिम्मेवारीलाई उत्कृष्ट तवरले निभाएकोप्रति प्रशंसा गरेका थिए।

साथै डीआईजी पालले सशस्त्र प्रहरी बलको परिचालनको नीतिलाई आत्मसाथ गरी संगठनको भिजन अनुसार सीमा सुरक्षा, आन्तरिक सुरक्षा र राजस्व संकलनको अवधारणालाई प्राथमिकतामा राखी प्रभावकारी ढंगले   संगठनको उद्धेश्य प्राप्तिको लागि उच्च मनोबल एवं कार्यकुशलता प्रदर्शन गर्न सशस्त्र प्रहरी नं.३० गणका गणपतिसहित सकल दर्जालाई  निर्देशन दिएका थिए।

कार्यक्रममा नेपालगन्जका मेयर प्रशान्त बिष्ट लगायत जिल्ला स्थित सुरक्षा समितिका पदाधिकारीहरुले सीमा सुरक्षा, जिल्लाको शान्ति सुरक्षा तथा विपद् व्यवस्थापनमा सशस्त्र प्रहरी बल नं.३० गण बाँकेले पुऱ्याएको योगदानको मुक्तकण्ठले प्रशंसा गरेका थिए। उनीहरुले आगामी दिनमा पनि सशस्त्र प्रहरी बल नं.३० गणले अझ बढी कटिबद्ध र ब्यवसायीक रही जिम्मेवारी निर्वाहमा निरन्तर योगदान दिई रहने विश्वास लिएको बताएका थिए।

सशस्त्र प्रहरी बल नं.३० गणका अनुसार आजको स्थापना दिवसमा शहिद परिवारहरुलाई दोसल्लाले सम्मान गरिनुका साथै उत्कृष्ट कार्य र बिभिन्न विधातर्फको खेलमा प्रथम हुने सशस्त्र प्रहरी कर्मचारीहरुलाई पुरस्कार तथा प्रमाण पत्र बितरण गरिएको थियो। कार्यक्रममा वि.सं.२०८१ मा अवकाश गएका सशस्त्र प्रहरी कर्मचारीहरुलाई पनि सम्मान गरिएको हो।

बिभिन्न साँस्कृतिक झलक समेत देखाइएको कार्यक्रममा शहिद परिवार, पूर्व शस्त्र प्रहरी, गण तथा मातहतमा कार्यरत सिनियर अधिकृत, जुनियर अधिकृत, बिल्लादार सशस्त्र प्रहरी कर्मचारी तथा जवानहरुको उपस्थिती रहेको सशस्त्र प्रहरी बल नं.३० गण बागेश्वरी बाँकेले जनाएको छ।