अदालतको आदेशपछि रवि लामिछानेलाई घरबाटै पक्राउ गर्‍यो प्रहरीले

काठमाडौं । उच्च अदालतले थुनामा पठाउने आदेश दिएसँगै  प्रहरीले राष्ट्रिय स्वतन्त्र पार्टीका सभापति रवि लामिछानेलाई  पक्राउ गरेको छ । 

उपत्यका अपराध अनुसन्धान कार्यालयको टोलीले उनलाई बुढानीलकण्ठस्थित घरबाट पक्राउ गरेको हो ।आज  उच्च अदालत तुलसीपुरको बुटवल इजलासले उनलाई सहकारीको रकम ठगेको कसुरमा पुर्पक्षका लागी थुनामा पठाउन आदेश गरेको थियो । न्यायाधीशद्वय रमेश ढकाल र स्वीकृति पराजुलीले सो आदेश गरेका हुन् ।

उच्चको आदेशसँगै यसअघि लामिछानेलाई जिल्ला अदालत रुपन्देहीले १ करोड धरौटीमा छाड्ने आदेश बदर भएको छ । बुटवलको सुप्रिम सहकारी प्रकरणमा रुपन्देही जिल्ला अदालतले १ करोड धरौटी रकम मागेको आदेशमा चित्त नबुझाएर लामिछानेले उच्च अदालतमा निवेदन दिएका थिए ।

उच्चले जिल्लाको आदेश बदर गरेर उनलाई थुनामै राख्ने आदेश गरेको छ । भोलि उनलाई अदालतमा उपस्थित गराइने उपत्यका अपराध अनुसन्धान कार्यालयले जनाएको छ।