काठमाडौंबाट ठुलो परिमाणको लागुऔषधसहित तीन जना सशस्त्र प्रहरीको नियन्त्रणमा

काठमाडौं । सशस्त्र प्रहरीले काठमाडौँको सतुंगलबाट लागूऔषधसहित आज बिहान तीन जनालाई पक्राउ गरेको छ ।

सशस्त्र प्रहरीका अनुसार पक्राउ पर्नेमा मोरङ्गको मिक्लाजुङ्ग–८ घर भई काठमाडौ बस्ने वर्ष ४५ का अमर बहादुर दर्जी, महोत्तरीको मनरासिस्वा नगरपालिका–२ बस्ने वर्ष ३० का सन्दिप सिंह र काठमाडौ महानगरपालिका–८ बस्ने वर्ष ३३ का आसिक सिंह रहेका छन् ।

बाराको सिम्रौनगढ, कलैया, वीरगन्ज हुँदै काठमाडौं आउँदै गरेको यात्रुवाहक बसमा सवार उनीहरुलाई विशेष सूचना आधारमा सशस्त्र प्रहरी बल ईन्टेलिजेन्स व्यूरोको टोलीले उक्त लागूऔषधसहित नियन्त्रणमा लिएको हो । 

सशस्त्र प्रहरी प्रधान कार्यालय दिएको जानकारी अनुसार बरामद गरिएको लागूऔषधमा डाईजोपाम, नोफिन र फेनारगन रहेका छन् । सशस्त्र प्रहरीले बरामद गरेको लागुऔषधसहित पक्राउ गरेका तीनै जनालाई आवश्यक कारवाहीको लागि सम्बन्धित निकायमा बुझाएको छ।