रुपन्देहीबाट दुईवटा गाडीसहित लाखौं रुपैयाँको अवैध सामाग्री सशस्त्र प्रहरीको नियन्त्रणमा

रुपन्देही । सशस्त्र प्रहरीले रुपन्देहीबाट अवैध तस्करी गरेर ल्याइएको सामाग्रीसहित  दुईवटा गाडी नियन्त्रणमा लिएको छ।

सशस्त्र प्रहरी बल नं.२७ गण मातहत रहेको नेपाल सुरक्षा वेश बुटवलले १४ लाख ४ हजार ७ सय ६५ रुपैयाँ बराबरको विभिन्न किसिमका अवैध सामाग्रीसहित दुई वटा गाडी नियन्त्रणमा लिएको सशस्त्र प्रहरी प्रधान कार्यालयले जानकारी दिएको छ।

सशस्त्र प्रहरीले बुटवल उपमहानगरपालिका–६ ट्राफिक चोकस्थित सिद्धार्थ राजमार्गबाट करीव ७ लाख ६४ हजार ५ सय ३५ रुपैयाँ बराबरको चिउरा तथा लत्ताकपडा समेत  बरामद गरेको प्रधान कार्यालयले जनाएको छ।

सशस्त्र प्रहरीका अनुसार बुटवलबाट पोखरातर्फ जाँदै गरेको लु १ ज ३७९६ नम्बरको बोलेरो पिकअप गाडीमा राखी लैजाँदै गरेको ६१ बोरा चिउरा र लत्ताकपडासहित उक्त गाडी नियन्त्रणमा लिइएको थियो।

यसैगरी सोही उपमहानगरपालिका–१३ जितगढी स्थित पूर्वपश्चिम लोकमार्गबाट करीव ६ लाख ४० हजार २ सय ३० रुपैयाँ बराबरको सामानसहित गाडी नियन्त्रणमा लिएको सशस्त्र प्रहरी प्रधान कार्यालयले जानकारी दिएको छ।

पश्चिमबाट पूर्वतर्फ आउँदै गरेको लु १ च ५६२० नम्बरको गाडीमा राखी ल्याउँदै गरेको लत्ताकपडा तथा जुत्ताचप्पलसहित उक्त गाडी नियन्त्रणमा लिइएको सशस्त्र प्रहरीले जनाएको छ।

सशस्त्र प्रहरीले बरामद गरेको सामान तथा दुईवटै गाडीलाई आवश्यक कारवाहीको लागि भैरहवा भन्सार कार्यालय बेलहियामा बुझाएको जानकारी दिएको छ । सशस्त्र प्रहरी प्रधान कार्यालयले दिएको जानकारी अनुसार बरामद गरिएको सबै अवैध सामाग्रीको मल्य १४ लाख ४ हजार ७ सय ६५ रुपैयाँ र दुईवटै गाडीको मुल्य २२ लाख गरी जम्मा भन्सार दाखिला मुल्य ३६ लाख ४ हजार ७ सय ६५ रुपैयाँ कायम गरी भन्सार कार्यालयमा बुझाईएको हो ।